NYT: Turistët të vizitojnë Shqipërinë në 2014-ën

Shqipëria vazhdon të mbetet një nga destinacionet e frekuentuara turistike në botë. Të vecantat që ofron Shqipëria vazhdojnë të zënë gjithmonë e më shumë vend në faqet e të përditshmeve prestigjioze ndërkombëtare

Së fundi, gazeta prestigjioze amerikane “New York Times” u rekomandon turistëve botërorë në destinacionet e tyre për 2014-ën të vizitojnë edhe Shqipërinë.

Gazeta amerikane “New York Times”, në artikullin kushtuar 52 vendeve që duhen vizituar për vitin 2014, e përfshinë Shqipërinë në katër vendet e para.

Në përshkrimin për Shqipërinë, thuhet se në bregdetin e saj mund të gjendet bukuria e bregdetit të Dalmacisë, me rrënojat e pazbuluara të Turqisë apo Greqisë, ku mblidhet natyra karakteristike e vendeve rurale të Italisë, transmeton shekulli.

“New York Times” shkruan se, zhvillimi i shfrenuar pas komunizmit që kërcënonte të kthente gjithçka në beton, por frenohet nga qeveria e re që ka premtuar për ta mbajtur bregdetin autentik. Sipas gazetarëve amerikanë në vendin antik të Butrintit mund të qëndrohet për më pak se 50 dollarë në natë.  

“Në fshatrat si Qeparoja, me sytë nga Korfuzi, mund të bësh kajak në tunelet e nëndetëseve të Luftës së Ftohtë, mund të notosh krah kështjellave të braktisura dhe të shikosh baticën gjatë mbrëmjes me peshk të freskët në hotelet e Rivierës. Kjo është Evropa kur ishte e freskët dhe e lirë.”, shkruan New York Times.

/albinfo.ch/