Policia në aksion, 1300 gjoba për 24 orë

Vetëm gjatë 24 orëve të kaluara, Policia e Tiranës ka vendosur 1303 gjoba, kryesisht për tejkalim të shpejtësisë dhe parkim të gabuar

Autoritetet shqiptare të rendit po mundohen të kthejnë rregull nëpër rrugët e Shqipërisë. Vetëm gjatë 24 orëve të kaluara, Policia e Tiranës ka vendosur 1303 gjoba, kryesisht për moszbatim të sinjalistikës, ecje tej normave të lejuara dhe parkim të gabuar.

Në një njoftim të Policisë së Tiranës thuhet se uniformat blu kanë planifikuar masa konkrete për përmirësimin e parametrave të qarkullimit rrugor në kryeqytet.

“Policia e kryeqytetit, në zbatim të përgjegjësive të saj ligjore, nuk ka për synim ndëshkimin e drejtuesve, por sensibilizimin dhe ndërgjegjësimin e tyre për të respektuar me rigorozitet normat e Kodit Rrugor gjatë drejtimit të automjetit”, thuhet në njoftimin e policisë.

Policia e Tiranës gjithashtu kërkon edhe bashkëpunimin e përdoruesve të rrugës, si të këmbësorëve ashtu edhe të drejtuesve të mjeteve, për respektimin e dispozitave në fushën e qarkullimit rrugor.

Ndryshe, Shqipëria njihet si vendi që më së paku në rajon respektohen rregullat e komunikacionit, prandaj edhe aksidentet fatale janë shumë të theksuar.  Me vendosjen e këtyre masa Ministra e Punëve të Brendshme parashikon uljen e aksidenteve në trafik.

Ministri i Brendshëm, Saimir Tahiri tha se brenda një muaji janë ulur për 38 për qind numri i aksidenteve me pasojë vdekjen. Po ashtu, sipas tij, janë ulur për 20 për qind aksidentet me pasojë plagosje të rënda dhe janë ulur me 8 për qind aksidentet me plagosje të lehta.