Nis “konvertimi” i MUP-it në Policinë e Kosovës

Sot janë nënshkruar kontratat e punës me 16 zyrtarë policorë si dhe është nënshkruar Deklarata e betimit në përputhje me parimet dhe procedurat e Policisë së Kosovës

Marrëveshja e arritur një javë më parë në Bruksel, ndërmjet kryeministrit të Kosovës, Hashim Thaçi dhe kryeministrit serb, Ivica Daçiq për integrimin e serbëve të veriut në Policinë e Kosovë, ka
filluar të realizohet nga dita e sotme.

Të premten në Drejtorinë Rajonale të Policisë së Kosovës në pjesën Veriore të Mitrovicës ka filluar integrimi i ish-pjesëtareve të MUP-it (Ministria e Punëve të Brendshme e Serbisë) në Policinë e Kosovës.

Sipas një njoftimi lëshuar nga Ministria kosovare e Punëve të Brendshme, sot janë nënshkruar kontratat e punës me 16 zyrtarë policorë si dhe është nënshkruar Deklarata e betimit në përputhje me
parimet dhe procedurat e Policisë së Kosovës.

“Nënshkrimit të kontratës së punës i ka paraprirë procesi i verifikimit të identitetit të tyre nga ana e Agjencisë së Regjistrimit Civil të MPB-së dhe verifikimit të së kaluarës së tyre nga ana e PK-së
dhe EULEX-it”, thuhet në  njoftimin e qeverisë.

Pas nënshkrimit të kontratave të punës, zyrtarët e rinj të Policisë së Kosovës, nga e disa e hënë, 16 dhjetor 2013, do të fillojnë trajnimin në Akademinë e Kosovës për Siguri Publike në Vushtrri për t’u pajisur me njohuri lidhur me legjislacionin e Republikës së Kosovës, organizimin e brendshëm të PK-së.

“Procesi i integrimit të pjesëtarëve tjerë do të vazhdojë sipas dinamikës së paraparë, në përputhje me procedurat të rekrutimit dhe kornizën ligjore të Policisë së Kosovës”, thuhet në njoftimin e
Ministrisë së Punëve të Brendshme të Kosovës.

Ndryshe, pranimi i pjesëtarëve të MUP-it brenda sistemit të Policisë së Kosovës, është konsideruar i ngutshëm, madhe jo parimor. Për këtë çështje është zhvilluar një debat i ashpër dje në Kuvend, ndërsa opozita akuzoi qeverinë se po bën hapa të ngutshëm në veri.

Ndërkaq, në takimin e radhës në Bruksel, që u mbajt të premten ndërmjet dy kryeministrave, Thaçi e Daçiq, nuk u arrit marrëveshja sa i përket çështjes së gjyqësorit në veri. Edhe ky takim, është
ndërmjetësuar nga shefja e Politikës së Jashtme të Bashkimit Evropian, Catherine Ashton.

“Ne kishim një takim konstruktiv. Është pajtueshmëri e plotë se duhet të jetë një sistem unik i drejtësisë, ndërsa marrëveshje nuk ka”, ka thënë kryeministri i Kosovës, duke paralajmëruar se tani u mbetet ekipeve teknike të vazhdojnë punën e tyre.

Kryeministri serb, ndërkaq, Ivica Daçiq, ndërkaq ka shprehur keqardhjen e tij që që pala e Prishtinës nuk i është përmbajtur qëndrimeve të grupeve punese. Ai tha se do të vazhdojnë punën e tyre,
por që dy kryeministrat nuk do të takohen ditëve të ardhshme.