Presidenti Meta: “Vallja e Tropojës”, të bëhet pjesë e UNESCO-s

“Vallja e Tropojës” është një nga thesaret më të çmuara të trashëgimisë kulturore e artistike të Shqipërisë dhe duhet të promovohet edhe më tej, për t’u bërë pjesë e trashëgimisë kulturore botërore. 

Për këtë, presidenti Ilir Meta ka takuar kryetarin e shoqatës “Kcimi i Tropojës”, Skënder Haklaj, me të cilin tha se duhet bërë shumë më shumë për ruajtjen e kësaj pasurie folklorike të Malësisë së Gjakovës dhe bërjen e saj pjesë të UNESCO-s, së bashku me pasuritë e tjera kulturore shqiptare, përcjell albinfo.ch.

 “Vallja apo “Kcimi i Tropojës” është e lashtë sa vetë popullsia e kësaj krahine dhe është karakteristike vetëm për këtë zonë në veri të Shqipërisë”, tha presidenti. 

Kjo pasuri e çmuar kombëtare është shpallur nga Ministria e Kulturës dhe Akademia e Shkencave si pjesë e listës së kryeveprave të Trashëgimisë Kulturore jomateriale.