Zhvlerësohet borxhi publik i Shqipërisë

Zhvlerësimi vjen pas rritjes së fortë dhe të pa paralajmëruar të borxhit publik, i cili pritet që në fund të vitit të arrijë në 67 për qind të prodhimit kombëtar

Janë identifikuar lëvizje me rrezik për financat publike të Shqipërisë nga institucioni i njohur i financave “Standard and Poor’s”. ai ka bërë të ditur se ka zhvlerësuar borxhin e qeverisë shqiptare nga B plus, në B, një lëvizje që pasqyron qartazi rrezikun e lartë të financave publike.

Kompania deklaroi se zhvlerësimi vjen pas rritjes së fortë dhe të pa paralajmëruar të borxhit publik, i cili pritet që në fund të vitit të arrijë në 67 për qind të prodhimit kombëtar, nga 58 për qind, që vlerësohej më parë.

“Standard and Poor’s” thotë se pjesa më e madhe e këtij devijimi i dedikohet njohjes nga Deloitte, së fundmi, të detyrimeve të prapambetura që qeveria ka ndaj biznesit, të cilat – sipas saj arrijnë në 4 për qind të Prodhimit të Brendshëm Bruto, njofton tch.

Vlerësimi negativ, vëren kompania, reflekton edhe rrezikun që Shqipëria mund të ndeshë në rinovimin e borxhit ekzistues në tregjet e huaja.

“Standard and Poor’s” vlerëson se financat publike të Shqipërisë u përkeqësuan ndjeshëm gjatë këtij viti, veçanërisht për shkak të politikës së ndjekur nga qeveria e kaluar, para zgjedhjeve, që e çoi deficitin fiskal për këtë vit në 6.5 për qind të Prodhimit të Brendshëm Bruto.