Rritet numri i azilkërkuesve në BE

Sipas Eurostat, nga Serbia, Maqedonia, Shqipëria e Kosovës në vendet e Bashkimit Evropian kanë kërkuar azil rreth 47 mijë refugjatë

Gjatë dy muajve të fundit është rritur dukshëm numri i azilkërkuesve nga Maqedonia në vendet e Bashkimit Evropian (BE). Kështu thonë shifrat e Eurostatit, sipas të cilëve, ende Serbia e mbanë primatin për kërkim azili në vendet e BE-së.

Sipas Eurostat, trendi i rritjes së azilkërkuesve nga vendet e Ballkanit Perëndimor vazhdon edhe më tej. Sipas kësaj agjencia të statistikave, nga Serbia, Maqedonia, Shqipëria e Kosovës në BE kanë kërkuar azil rreth 47 mijë refugjatë.   

Eurostat bën të ditur se 15 për qind nga numri i përgjithshëm i azilkërkuesve janë nga vendet e Ballkanit. Destinacionet më të preferuar për azil janë Gjermania, Suedia, Franca, Zvicra, Belgjika dhe Luksemburgu.

Në Gjermani numri i azilkërkuesve nga Ballkani në nëntor është rritur për 143 për qind, ndërsa e dyta është Franca me 133 për qind rritje të numrit.

Me këtë fluks masiv mediat evroperëndimore bëjnë të ditur se ekziston rreziku real për mundësinë e kthimit të vizave për Serbinë, e cila prinë me numrin më të madh të azilkërkuesve të rrejshëm, më pas vijon Maqedonia, Shqipëria dhe Kosova.

Numri më i madh i azilkërkuesve janë të komunitetit rom nga këto vende të rajonit, raporton INA. Por, përkundër këtij fluksi masiv, Gjermania ka aplikuar masa emergjente dhe menjëherë ka urdhëruar kthimin e të gjithë aplikuesve për azil.

Ministrja e Punëve të Brendshme në Maqedoni, Gordana Jankullovska theksoi sot se po vazhdojnë masat për parandalimin e azilkërkuesve të rrejshëm në vendet e BE-së dhe të atyre që kalojnë kufirin dhe udhëtojnë drejt vendeve evroperëndimore për qëllime azili.

 “Ne po bëjmë përpjekje maksimale për të zvogëluar numrin e atyre kushtimisht të quajtur si aplikues të rrejshëm për përfitimin e statusit të azilit në BE. Ne kemi aplikuara masa parandaluese por edhe ndëshkuese për të gjithë ata që janë pjesë e këtyre aktiviteteve të paligjshme, që cënojnë edhe procesin e liberalizimit të vizave”, deklaroi Jankullovska