Lajme

Kosovë, pleq e të rinj në internet

76.6 për qind e kosovarëve, mbi moshën 10 vjeçare, janë të lidhur ngushtë me internetin, prej të cilëve 50.3 për qind janë meshkuj ndërsa 49.7 për qind janë femra

E mërkurë, 20 Nëntor 2013 - 21:06 albinfo.ch

Më shumë se se dy të tretat e qytetarëve të Kosovës e shfrytëzojnë intensivisht internetin, duke e ngritur Kosovën në nivelin më të lartë të shfrytëzimit të komunikimit digjital. Këto të dhëna kanë dalë nga Shoqata për Teknologji të Informacionit dhe Komunikimit të Kosovës (STIKK).

Sipas kësaj shoqate, janë 76.6 për qind e kosovarëve, mbi moshën 10 vjeçare, janë të lidhur ngushtë me internetin, prej të cilëve 50.3 për qind janë meshkuj ndërsa 49.7 për qind janë femra

Këto statistika dolën gjatë prezantimit të një raporti rreth përdorimit të internetit me temë, “Kosova në përputhje me standardet globale për depërtimin dhe përdorimin e internetit”. Po ashtu sipas këtyre të dhënave, nuk vërehet një ndarje sa i përket përdorimit të internetit edhe në vendet rurale dhe urbane.

Petrit Selimi është zëvendësministër i Punëve të Jashtme. Ai tha se ky raport tregon për një numër të madh përdoruesish interneti në Kosovë duke mos pasur ndarje në mes të punësuarve dhe të papunësuarve.

“Raporti flet se Kosova jo vetëm që është në nivel të përdorimit të internetit në Ballkan, por është edhe më lartë se shtetet fqinje, ku kemi një popullatë e cila është e gatshme t’i adopton mënyrat më të reja te komunikimit digjital”, tha ai, citon KL.

Sipas tij, edhe të papunët e përdorin internetin, i cili është një mënyrë e shkëmbimit të informatave dhe gjetjes së punës më shpejt.

Ambasadori i Norvegjisë në Kosovë, Jan Braathu, tha se në raport me rajonin Kosova ka një numër shumë më të madh përdoruesish interneti, dhe se kjo tregon për një zhvillim shumë të madh në këtë aspekt.

“Ky studim tregon për një depërtim të lartë të internetit në Kosovë, ku 84% janë shtëpiak që do të thotë se populli kosovarë ka pasur një progres të madh gjatë kësaj periudhe kohore”, ka thënë ai.

Edhe ambasadori i Britanisë së Madhe në Kosovë, Ian Cliff, tha se depërtimi i internetit në Kosovë është shumë i madh në krahasim me vendet e rajonit.

“Çështja kryesore është se depërtimi i internetit në Kosovë është shumë i madh krahasuar me vendet e tjera, dhe mendoj se do të ishte mirë që në të ardhmen njerëzit të kenë qasje edhe në shërbimet publike përmes internetit”, theksoi ai.