Rivotimi i qetë, pjesëmarrja e ulët

Nga 23 mijë qytetarë sa kanë pasur të drejtë vote, në rivotime kanë marrë pjesë vetëm 22 për qind. Policia e Kosovës dhe EULEX-i kanë garantuar siguri të plotë

Në ora 19:00 mbrëmjes janë mbyllur pa asnjë incident, të gjitha vendvotimet në tri qendrat e votimit në veriun e Mitrovicës, njoftoi Komisioni Qendror i Zgjedhjeve. Të drejtën për të votuar e kanë pasur 23 mijë qytetarë, ndërsa në votime kanë marrë pjesë vetëm 22.3 për qind e qytetarëve.

“Duke u bazuar në raportin e Komisionit Komunal të Zgjedhjeve, dalja e votuesve në tri qendrat e votimit në komunën e Mitrovicës veriore ka qenë 22,38 për qind, nga të gjithë votuesit e këtyre tri qendrave në komunën e Mitrovicës së veriut”, ka deklaruar Valdete Daka, kryetare e KQZ-së.

Sipas kësaj të fundit, numërimi i fletëvotimeve do të bëhet në Qendrën e Numërimit dhe Rezultateve në Prishtinë, ndërsa nuk dihet nëse do të ketë rezultate preliminare sot.

Ndryshe, procesin e rivotimit e kanë siguruar 200 pjesëtarë të Policisë së Kosovës, disa pjesëtarë të KFOR-it dhe të EULEX-it. Këto tri struktura kishin larguar dhunshëm nga vendvotimet pjesëtarë të organizatës paralele “Civilna Zastita”, e cila kishte shkuar aty, kinse për të garantuar siguri.

Zëvendësdrejtori rajonal i Policisë së Kosovës në rajonin e Veriut, Besim Hoti, ka thënë se procesi zgjedhor ka përfunduar pa asnjë incident, për shkak edhe të pranisë së madhe të forcave të sigurisë.

“Gjithçka ka shkuar ashtu edhe siç kemi planifikuar, nuk ka ndodhur as edhe më i vogëli incidente. Vendvotimet janë mbyllur në kohen e duhur dhe kjo ka dëshmuar gjithë përkushtimin, jo vetëm të Policisë së Kosovës, por edhe të KFOR-it dhe të EULEX-it për krijimin e ambientit të qetë dhe të sigurt për të gjithë votuesit”, ka thënë Hoti.

Këto janë zgjedhjet e para demokratike që mbahen në Mitrovicën e veriut, ndërsa në garë për kryetarë komune janë pesë kandidatë, në mesin e tyre edhe Agim Deva i PDK-së. Në këto zgjedhje Beogradi ka mbështetur hapur kandidatin e Listës “Srpska” Kerstimir Pantiq.