Përgjigjet Xhabiri: Bënë puç ndaj meje

Nëpërmjet një njoftimi për media, prof. dr, Xhabir Hamiti thotë se ligjërisht vazhdon të mbetet kryetar i Kuvendit të Bashkësisë Islame të Kosovës deri më 18.10.2013

Një ditë pas shkarkimit nga detyra e kryetarit të Kuvendit të Bashkësisë Islame të Kosovës (BIK) është përgjigjur publikisht Xhabir Hamiti, duke e quajtur “puç” vendimin e djeshëm të anëtarëve të Kryesisë së BIK-ut. Ai tha se shkarkimi ka qenë joligjor, dhe i pajustifikueshëm.

Nëpërmjet një njoftimi për media, prof. dr, Xhabir Hamiti thotë se ligjërisht vazhdon të mbetet kryetar i Kuvendit të BIK-ut deri më 18.10.2013.

“Çdo nënshkrim dhe çdo procedim i çfarëdo dokumenti zyrtar të Kuvendit të BIK-ut, pa dijen time, deri në përfundimin e mandatit tim të rregullt dhe ligjor, është jolegjitim, ndërsa përgjegjësia do të bie mbi ata që marrin këtë guxim”, deklaron Hamiti.

Ndryshe, reagimi i tij pason një vendim “ad hock” të anëtarëve të Kuvendit të BIK-ut, për shkarkimin nga kjo detyrë. Arsyetimi i anëtarëve ka qenë se Hamitit nuk i ka përmbushur     obligimet ligjore për çka është zgjedhor, e me theks të veçantë ka lëshuar demonstrativisht  mbledhjen e djeshme të Kuvendit.  

“Shfrytëzojë rastin që të njoftojë gjithë opinionin se dje në Kuvendin e BIK-së, është bërë një puç i pa precedan deri më tani, për faktin se nuk ka ndodhur asnjëherë që kryetari i Kuvendit, me procedurë ad-hoc, pa inicime paraprake juridike…”, deklaron Hamiti. 

Sipas tij, pa konsultime të komisioneve disiplinore të kuvendit dhe atij administrativo- juridik, nuk mund të shkarkohet një kryetar nga Kuvendi. Por, Hamiti thotë se në këtë lojë, kanë gisht edhe drejtuesit e BIK-it, duke apostrofuar Myftiun Naim Tërrnava.

“Jam plotësisht i vetëdijshëm se këtë nuk do ta bënin kurrë, vetëm anëtarët e Kuvendit pa inicimin, shtytjen dhe trysnin e vazhdueshme që atyre i`a kanë bërë disa nga pjesëtarët e kryesisë së BIK-së, së fundi me qëllim të eliminimi tim nga vendimmarrja”, deklaron Hamiti, militanti i islamit tradicional.

Profesori i shkencave islame, thotë se gjatë gjithë kohës ka qenë i shtyrë që marrë vendime që bien ndesh më parimet e islamit. Madje, sipas tij, edhe dje ka qenë i shtyrë që ta ndryshojë Kushtetutën e BIK-ut, me të cilin t’i mundësohet Myftiut të zgjidhet më shumës se dy herë Myfti i Kosovës.

“Pavarësisht kërcënimeve, shantazheve dhe lutjeve, nuk kam pranuar që të bëjë kompromise në dëm të institucionit dhe besimtarëve mysliman. Kam kërkuar që në të ardhmen të punojmë bashkërisht, në respektimin e kushtetutës aktuale deri në zgjedhje”, deklaroi ai.

Të gjithë punonjësit, siç tha në vazhdim Hamiti, janë të interesuar që puna e tyre në BIK-së të mbështetet në ligj dhe në rregulla të mirëfillta dhe transparente.

“I sigurojë të gjithë punonjësit e BIK-së se unë legjitimisht jam ende kryetar i Kuvendit të BIK-së, deri në mandatin tim të rregullt, i cili përfundon më 18.10.2013”, deklaroi në fund të reagimit Xhabir Hamiti, kleriku që ka mbështetur në vijimësi islamin tradicional shqiptar, dhe jo atë të ndikuar nga wehabizmi