Luksemburgu rikonfirmon mbështetje për Kosovën

Luksemburgu e ndihmon Kosovën në fushën e aftësimit profesional, shëndetësisë, ujësjellësit, ndërsa është shprehur nevoja për të vazhduar këtë ndihmë edhe në të ardhmen

Shefi i Misionit Diplomatik të Luksemburgut në Kosovë, Pierre Weber, i rikonfirmoi ministrit të Zhvillimit Ekonomik, Fadil Ismajli mbështetjen e vazhdueshme të vendit të tij për Kosovën. Ai tha se Luksemburgu dëshiron që ky bashkëpunim të avancohet në të gjitha fushat.

Këto komente Weber i bëri gjatë një takimi që zhvilloi me ministrin Ismajli. Vlen të theksohet se i tërë takimi u zhvilluar në gjuhën shqipe pasi diplomati Weber është njohës i mirë i gjuhës shqipe.

Ndërkaq, ministri Ismajli ka falënderuar diplomatin e Luksemburgut për ndihmën e madhe që ky shtet i ka dhënë Republikës së Kosovës që nga vitet 99 dhe vazhdon t’i japë në zhvillimin sektorëve kyç për rritjen e kualitetit të shërbimeve për qytetarët e vendit.

Kreu i MZHE-së dhe diplomati Weber kanë nënvizuar nevojën e një kujdesi të shtuar në  mbrojtjen e produktet vendore duke pasur parasysh që ka një mori të produkteve që prodhohen në vend, sidomos në projekte që financohen nga institucione ndërkombëtare.

Ministri Ismajli ka theksuar se duke qenë se Luksemburgu gëzon përvoja frytdhënëse në fusha të ndryshme, është mjaft e rëndësishme të shkëmbehen përvojat profesionale dhe njohuritë në fusha relevante për Kosovën si dhe të ndërtohen bashkërisht kapacitetet ekzistuese të burimeve njerëzore.

 Gjithashtu, gjatë takimit janë prezantuar projektet që financohen nga Luksemburgu në fushën e aftësimit profesional, shëndetësisë, ujësjellësit si dhe mundësitë për investime në këta sektorë edhe në të ardhmen.