Bien të hyrat nga telefonia fikse në Kosovë

Të hyrat vjetore nga telefonia fikse në Kosovës janë: 17.3 milionë euro në vitin 2012; 20 milionë euro në vitin 2011 dhe 20 milionë euro në vitin 2010

Hyrja në trend e telefonisë mobile ka lënë mbrapa telefoninë fikse. Sipas raportit vjetor të Autoritetit Rregullativ të Komunikimeve Elektronike dhe Postare (ARKEP), për rreth 4500 është zvogëluar numri i përdoruesve të telefonisë fikse në Kosovë gjatë vitit 2012.

Bazuar në të dhënat e operatorëve, sipas Autoritetit Rregullativ të Komunikimeve Elektronike dhe Postare (ARKEP), në Kosovë janë rreth 81,603 përdorues aktivë të shërbimeve të telefonisë fikse, që shënon një rënie në numrin e përdoruesve me afërsisht 4,411 përdorues, apo rënie prej rreth 5.1 për qind krahasuar me 2011.

Trendi i rënies së telefonisë fikse, sipas ARKEP, ka vazhduar në vijimësi, përfhirë këtu rënie prej 7.7 për qind në krahasim me vitin 2010.

Njëkohësisht norma mesatare e penetrimit të telefonisë fikse për 100 banorë gjatë vitit 2012 ka qenë rreth 4.69 për qind, nivel ky që vazhdon të jetë mjaft më i ulët se vendet e rajonit, ku sillet rreth 25 për qind, si dhe të normës së penetrimit në shtetet e BE-së që është rreth 40%, raporton “Zëri”.

Në raportin e ARKEP potencohet se tregu i telefonisë fikse në Republikën e Kosovës po zhvillohet me ritme tejet të ngadalësuara, porse dukuri e njëjtë po ngjan edhe në shtetet rajonale dhe ato evropiane gjatë viteve të fundit.

Sipas Autoritetit, Postë Telekomi i Kosovës (PTK) ka mbi 94 për qind të tregut për nga numri i përdoruesve, përkatësisht 96 për qind në bazë të të hyrave të realizuara përmes ofrimit të këtyre shërbimeve, derisa telefonia fikse IPKO, ka shënuar rënie të lehtë sa i përket numrit të përdoruesve.

IPKO aktualisht rezulton me pjesëmarrje në treg prej 6 për qind të numrit të përdoruesve, respektivisht 4 për qind për nga të hyrat.

“Kjo dukuri mund të jetë rezultat i zëvendësimit dhe trendit gjithnjë në rritje të përdorimit të telefonisë mobile në raport me telefoninë fikse. Po ashtu, ofertat me tarifa shumë të leverdishme nga operatorët dhe ofruesit e shërbimeve të telefonisë mobile, kanë ndikuar që konsumatorët të zëvendësojnë shërbimet e telefonisë fikse me ato të telefonisë mobile”, thuhet mes tjerash në raport.

Ndërsa, nëse krahasohen të hyrat nga trafiku i telefonisë fikse në fundin e vitit 2012, në raport me atë 2011, mund të vërehet se trafiku i telefonisë fikse ka shënuar rënie të ndjeshme prej afro 13.29 për qind.

Ndryshe të hyrat vjetore nga telefonia fikse në Kosovës janë: 17.3 milionë euro në vitin 2012; 20 milionë euro në vitin 2011 dhe 20 milionë euro në vitin 2010.