Marrëveshje për pikën e re kufitare

U nënshkrua marrëveshja ndërmjet Republikës së Kosovës dhe Republikës së Maqedonisë, për hapjen e pikës se re kufitare, Bellanoc- Stançiç

Ministri i Punëve të Brendshme i Republikës së Kosovës, Bajram Rexhepi dhe ministrja e Punëve të Brendshme e Republikës së Maqedonisë, Gordana Jankullovska, nënshkruan Marrëveshjen e Menaxhimit të Përbashkët të Kufirit, në vendkalimin Bellanoc-Stançiç.

Me këtë rast, ministri Bajram Rexhepi theksoi se hapja e pikës së re të përbashkët kufitare Bellanoc- Stançiç është e një rëndësie të veçantë për qytetarët nga të dyja anët, duke pas parasysh se atyre i është dashur të udhëtojnë me kilometra për kalimin e kufirit.

Po ashtu, me rëndësi të veçantë ka transporti i mallrave në mes të dy vendeve dhe më gjerë në rajon.

Kjo pikë kufitare, nëpërmjet maleve të Karadakut, lidhë Kumanovën me komunën e Gjilanit dhe të Vitisë. Një nga problemet që kërkon zgjidhje emergjente është rregullimi dhe asfaltimi i rrugës prej 17 kilometrave në pjesën e Maqedonisë, pasi që Kosova ka disa vite që ka përfunduar rrugën drejt kufirit.

Ndërkaq, të dy ministrat theksuan se në një të ardhme të afërt, vendkalimi tjetër kufitare, ai i Glloboçicës që lidhë Tetovën m Kosovës, do të konkurrojë me projekt të përbashkët në fondet e Komisionit Evropian, që edhe ky vendkalim të bëhet vendkalim kufitar në përputhje me konceptin e Menaxhimit të Integruar të Kufirit të Përbashkët mes dy shteteve.

Vendkalimi kufitar në Glloboçicë, sipas MPP-së, do të jetë i karakterit ndërkombëtar, respektivisht i kategorisë A. Financimi do bëhet nga Komisioni Evropian, si projekt i përbashkët i të dy shteteve.