Zvicra, marrëveshje të tregtisë së lirë me Bosnjën

Marrëveshja e liberalizon tregtinë me produkte industriale, peshk dhe prodhime tjera të detit, produkte bujqësore...

Zvicra do të heqë tatimet nga tregtia me Bosnjën dhe Hercegovinën. Në konferencën e ministrave të vendeve anëtare të EFTA-s që u mbajt në Trondheim të Norvegjisë kjo organizatë ka lidhur marrëveshje të tregtisë së lirë me vendet si Bosnja, Kostarika dhe Panama.

Nga ana zvicerane marrëveshjen e ka nënshkruar ministri i ekonomisë Johann Schneider-Ammann. Me këtë marrëveshje e të shteteve anëtare të EFTA-s si Zvicra, Islanda, Norvegjia dhe Lihtenshtajni do t`i forcojnë marrëdhëniet tregtare me tri vendet e përmendura, bëhet e ditur në një komunikatë të publikuar nga Departamenti Federal për Ekonomi, Arsim dhe Hulumtime.

Marrëveshja për tregtinë e lirë me Bosnjë e Hercegovinën e liberalizon tregtinë me produkte industriale, peshk dhe prodhime tjera të detit si dhe me industrinë për përpunimin e produkteve bujqësore. Në marrëveshje përfshihen edhe rregulla për mbrojtjen e pronës intelektuale, për konkurrencë, për lehtësime tregtare, për qëndrueshmëri si dhe klauzolat për zhvillim të shërbimeve, investime etj.

Me këtë marrëveshje do të anulohen shumica e taksave që paguhen tash. Ndërsa taksat e mbetura do të hiqen më së largu më 1 janar 2018.