Çitaku thyen akullin, shkon në Beograd

Ministrja Vlora Çitaku ka udhëtuar për në Beograd për të marrë pjesë në një forum ballkanik. Ajo është përfaqësuesja e parë kosovare që viziton Beogradin gjatë 14 viteve të shkuara

Ministrja e Integrimit Evropian, Vlora Çitaku ka udhëtuar për në Beograd ku do të merr pjesë në seminarin “Integrimi në Bashkimin Evropian dhe procesi i normalizimit të marrëdhënieve në mes të Kosovës dhe Serbisë të organizuar nga “Forumi për Marrëdhënie Etnike” në Beograd.

Ministrja Çitaku do të jetë përfaqësuesja e parë e nivelit ministror që viziton Beogradin, prej që Kosova është ndarë nga Serbia më 1 qershor 1999, kur edhe ka përfunduar lufta ndërmjet dy vendeve.

“Vizita është bërë e mundur me ndërmjetësimin e zyrave të Bashkimit Evropian në Prishtinë dhe Beograd”, thuhet në një njoftim lëshuar nga Qeveria e Kosovës.

Në kuadër të vizitës, ministrja Çitaku do të ketë edhe takime të tjera me korin diplomatik të akredituar në Beograd.

Para Çitakut kanë bërë përpjekje për të udhëtuar drejt Serbisë edhe dy ministra të qeverisë Thaçi, ministri i Diasporës, Ibrahim Makolli dhe ministrja e Tregtisë dhe Industrisë, Mimoza Kusari-Lila. Këta dy të fundit e kishin pas destinacion Luginën e Preshevës, por ishin kthyer mbrapa nga autoritetet kufitare serbe.