Qeveria subvencionon vreshtarinë

Ministra kosovare e Bujqësisë ka mbështetur 39 projekteve të vreshtarëve në vlerë prej 209 mijë euro. Ministri Stavileci tha se vreshtaria është sektor strategjik për Kosovën

Ministria e Bujqësisë, Pylltarisë dhe Zhvillimit Rural ka nënshkruar kontrata për ndarjen e granteve investive për mbështetjen e 39 projekteve të vreshtarëve në vlerë prej 209 mijë euro.

Përmes këtyre granteve investive, synohet rritja e sipërfaqeve me vreshta të reja dhe modernizimi i infrastrukturës përcjellëse në këtë sektor.

Tridhjetë e nëntë vreshtarët përfitues, sipas një njoftimi lëshuar nga MBPZHR, do të financohen në shkallë prej 65 për qind nga Ministria e Bujqësisë.

Ministri i Bujqësisë, Blerand Stavileci tha se me këtë sektor po fillojnë edhe realizimin e programit mbështetës të këtij viti. Vreshtaria, sipas tij, është njëri prej sektorëve, për të cilin viteve të fundit qeveria është munduar t’i japim përkrahjen maksimale.

“Duke ditur rëndësinë e këtij sektori dhe problemet më të cilat është ballafaquar, krahas këtyre granteve investive, pjesë e programit janë edhe subvencionimi i sipërfaqeve ekzistuese të vreshtave me nga 200 euro për një hektar dhe subvencionimi i stoqeve të verës”, tha ministri Stavileci.

Përmes rritjes së mbështetjes për vreshtarinë dhe verëtarinë, ministri kosovar i Bujqësisë tha se synojnë që dalëngadalë t’u japin fund edhe problemeve, të cilat i kanë përcjellë viteve të fundit vreshtarët.

Në anën tjetër, Hysen Canziba, njëri nga përfituesit e këtyre granteve, theksoi se kjo përkrahje është e domosdoshme në këtë sektor, pasi sipas tij, në këtë mënyrë atyre po iu lehtësohet edhe zgjerimi i veprimtarive të tyre bujqësore.

“Edhe pse nevojat në këtë sektor janë të mëdha, këto mjete dhe ato që pritet të ndahen në ditët e ardhshme, do të jenë një lehtësim i madh për punën e shumë vreshtarëve dhe verëtarëve”, tha vreshtari Canziba.

Ndryshe, Kosova ka kushte agroklimatike shumë të përshtatshme për zhvillimin e sektorit të vreshtarisë dhe deri më tani, Ministria e Bujqësisë ka përkrahur gjithsej 585 projekte të vreshtarëve për ngritjen e plantacioneve të reja dhe rregullimin e atyre ekzistuese, që shprehur në hektarë ka përkrahur gjithsej ngritjen e 374 hektarëve të rinj me vresht