Për kontrollim më efikas të armëve

Dy dhomat e Parlamentit kanë miratuar dy mocione përkatëse që kanë për synim mbrojtjen më të mirë nga armët e zjarrit.

E drejta për mbajtje të armëve, sipas të dy dhomave të Parlamentit të Zvicrës duhet të kufizohet edhe më tej. Ato kanë miratuar dy mocione përkatëse që kanë për synim mbrojtjen më të mirë nga armët e zjarrit.

Njerëzit që kanë blerë armë rishtas deri para pak vitesh nuk kanë qenë të detyruar t`i regjistrojnë armët në mënyrë sistematike. Po ashtu armët që më parë janë blerë në forma private ose janë  trashëguar, nuk janë të regjistruara askund. Kjo përbën problem edhe për policinë e cila në rastet e ndërhyrjeve të saj duhet të dijë nëse duhet të llogarisë se personat e kontrolluar kanë armë zjarri ose jo, ka thënë ministrja e drejtësisë dhe policisë Simonetta Sommaruga, shkruan nzz.ch.

Dhoma e Kantoneve ka pranuar në heshtje dhe pa asnjë kundërshtim propozimet e qeverisë, të kaluara më parë edhe nga Dhoma Nacionale.

Në bazë të tyre do të ndërtohet baza ligjore për krijimin e planifikuar të regjistrit të armëve në nivel kantonesh dhe të federatës.