SECO: Zvicra përfiton nga lëvizja e lirë

Migrimi nuk ka prodhuar pothuajse fare efekte negative ose presion mbi pagat në vend. Masat mbrojtëse paraprake janë dëshmuar si të efektshme

Marrëveshja për lëvizje të lirë e nënshkruar me BE-në ka pasur ndikim pozitiv në ekonominë e Zvicrës, vlerëson Sekretariati Shtetëror për Ekonomi (Seco). Sipas një studimi të realizuar nga universiteti i Cyrihut dhe ai i Lozanës, të mbështetur nga Seco, tregu zviceran i punës e ka absorbuar mirë fuqinë punëtore të huaj, kryesisht nga shtetet e BE-së.

Migrimi nuk ka prodhuar pothuajse fare efekte negative ose presion mbi pagat në vend. Masat mbrojtëse të marra paraprakisht janë dëshmuar si të efektshme, vlerësojnë autorët e studimit.

Më tutje studimi ka ardhur në konstatimin se në vitet e fundit ka pasur një ndryshim të hartës së vendeve të BE-së prej të cilave vijnë më shumë të huaj në Zvicër. Kështu, derisa numri i shtetasve të BE-së nga viti 2008 e këndej ka ardhur duke u zvogëluar ndjeshëm, është rritur numri i të ardhurve nga vendet jugore dhe lindore të BE-së.

Numri i të punësuarve nga viti 2002 deri në vitin 2012, sipas studimit të përmendur është rritur për 565000 veta. Imigrantët  nga zona BE-Efta kanë qenë me shumicë me kualifikime të larta.

Nga viti 2002 deri në vitin 2012 në Zvicër kanë ardhur mesatarisht nga 63300 të huaj në vit. 38400 prej tyre kanë qenë nga shtetet e BE-së dhe Efta-s. prej tyre 16300 gjermanë dhe 7500 portugezë.