SHBA e para, Zvicra e dyta, për nga aftësia konkurruese

SHBA është e para, Zvicra e dyta dhe Hong-Kongu në vendin e tretë në këtë listë prestigjioze në të cilën vitin e kaluar Hong Kongu ka qenë i pari

„Bussines School IMD” nga Lozana, në një ranglistë që ka bërë së fundi ka radhitur dhjetë vendet me ekonomi më konkurruese në botë. Po ashtu kësaj rangliste i shtohen edhe 70 vende tjera, që janë vlerësuar gjithashtu sipas aftësisë konkurruese.

SHBA është e para, Zvicra e dyta dhe Hong-Kongu në vendin e tretë në këtë listë prestigjioze. Vitin e kaluar Hong Kongu ka qenë i pari.Ndërsa Gjermania ka zënë vendin e nëntë dhe më lartë se ajo radhiten Suedia, Singapuri, Norvegjia, Kanadaja dhe Emiratet e Bashkuara Arabe.

Nga ana tjetër Franca, duke u radhitur vetëm e 28-a, ka zënë vend në mesin e shteteve me aftësi mesatare konkurruese. Përparim në këtë konkurrencë kanë arritur vendet si Kina, duke u rradhitur e 21-ta dhe Rusia, në vendin e 42-të.

Një vend i vogël si Luksemburgu është radhitur i 13-i ndërsa Britania e Madhe ka zënë vendin e 18. Japonia sipas kësaj rangliste është në vendin e 24 sa i përket aftësisë konkurruese ndërsa Tajlanda, në vendin e 27.