Komisioni parlamentar, pro iniciativës kundër pedofilisë

Iniciativa kërkon që personat pedofilë, të marrin një ndalim automatik dhe të përjetshëm për të ushtruar veprimtari që lidhen me fëmijët

Dhoma Nacionale e Parlamentit të Zvicrës qe shprehur në mënyrë të papritur në sesionin e fillimvitit në të mirë të iniciativës kundër pedofilisë. Por, pjesë të kundërpropozimit të bërë nga Qeveria Federale megjithatë duhet të zbatohen, ka vendosur të premten Komisioni Juridik i kësaj dhome.

Iniciativa popullore kërkon që personat të cilët kanë mbajtur dënimin për vepra pedofilie, të marrin një ndalim automatik dhe të përjetshëm për të ushtruar ndonjë veprimtari që lidhet me fëmijët. Ndërkaq Qeveria Federale e ka hedhur poshtë këtë iniciativë duke dhënë një kundërpropozim që parasheh ndalimin10 vjeçar të veprimtarive me fëmijë.

Por në aspektet tjera, qeveria shkon madje më larg se bartësit e iniciativës. Ajo kërkon ndalim të kontakteve me fëmijët dhe ndalim të kalimit në rajone të caktuara për personat e dënuar për pedofili.

Tash rreth iniciativës mbetet të shprehet edhe Dhoma e kantoneve e Parlamentit Federal të Zvicrës. Komisioni ka vendosur me rezultat 20:2 për lëndën dypjesëshe të iniciativës. Ndërsa ndryshimet i ka miratuar njëzëri. Në sesionin veror Dhoma Nacionale diskuton sërish për këtë çështje.