Irani paralajmëron Shqipërinë: Keni gabuar me muxhahedinët

Anëtari i Bordit Kryesues i Parlamentit iranian, Baqer Hosseini Seyed, paralajmëroi Tiranën se pranimi i anëtarëve MEK-së në Shqipëri përben rrezik. OKB përshëndet Shqipërinë

Autoritetet e Iranit kanë akuzuar Tiranën zyrtare për strehimi i 14 muxhahidinëve në Shqipëri. Teherani ka paralajmëruar Tiranën se pranimi i 14 prej 210 anëtarëve të organizatës Mojahedin-e-Khalq (muxhahedinët e popullit iranian), do të kërcënojë sigurinë kombëtare në Shqipëri.

Sipas agjencisë së lajmeve iraniane “Fars News”, anëtari i Bordit Kryesues i Parlamentit iranian, Baqer Hosseini Seyed, paralajmëroi Tiranën për prezencë të anëtarëve MEK-së në vendin e tyre.

“Qeveria e Shqipërisë duhet të shmangë përsëritjen e të njëjtit gabim që kanë bërë vendet e tjera në lidhje me pritjen e anëtarëve të MEK, sepse këta njerëz janë të rrezikshëm edhe për sigurinë kombëtare të atij vendi dhe gjithë rajonit”, paralajmëroi Hosseini.

Organizata e Kombeve të Bashkuara, ndërkaq ka përshëndetur veprimin e Shqipërisë për pranimin e muhaxhidinëve, raporton gazeta “Shqip”.

Ndryshe, në Shqipëri javën e kaluar, ka arritur grupi i parë prej 14 personash prej 210 anëtarëve të Organizata Mojahedin-e-Khalq (MEK). Kjo e fundit konsiderohet si opozita politike e regjimit të Mahmud Ahmadinexhadit në Iran.

Ministria e Brendshme e Shqipërisë ka marrë një plan masash për sigurimin e jetës së 14 muxhahedinëve iranianë, që kanë fituar statusin e azilit në Shqipëri, në një afat të papërcaktuar. Ata u strehuan fillimisht në një kamp në periferi të Tiranës, për t’u zhvendosur më pas në apartamente në kryeqytet

“Qeveria shqiptare ka deklaruar se është e gatshme të ofrojë strehim për 210 muxhahedinë dhe në këtë mënyrë i është përgjigjur pozitivisht kërkesës së SHBA për strehimin e anëtarëve të grupit MEK, të cilët ndodhen në kampin e ‘Liria’ në Irak”, tha përfaqësuesi i OKB-së, raporton TCH.

Organizata e Muxhahedinëve të Popullit Iranian ka deklaruar se jeta e mbi 3000 muxhahedinëve në kampet në Irak ka qenë në rrezik dhe për këtë arsye duhet të largoheshin të gjithë prej andej. Kështu, një nga vendet që ka pranuar të strehojë disa prej tyre është bërë edhe Shqipëria.