Shqyrtohet ulja e TVSH-së për “shportën ushqimore”

Zyrtarë të Ministrisë së Financave thonë se në rast të uljes së normës së TVSH-së në disa artikuj ushqimorë, duhet të ketë ngritje të TVSH-së në artikujt tjerë

Disa shtete të rajonit, por edhe disa shtete të BE-së, e kanë ulur Tatimin e Vlerës së Shtuar (TVSH) për artikujt bazik ushqimor, bukën, kripen, sheqerin, miellin, mishin etj, ndërsa në Kosovë, TVSH mbetet e njëjtë, sikurse për artikujt ushqimor, po ashtu edhe për ata luksoz.

Prandaj autoritet në Kosovë janë duke shqyrtuar mundësitë për uljen e normës së TVSH-së për artikuj të caktuar ushqimorë. Megjithatë, zyrtarë të Ministrisë së Financave thonë se në rast të uljes së normës së TVSH-së në disa artikuj ushqimorë, duhet të ketë ngritje të TVSH-së në artikujt tjerë.

Në Kosovë, TVSH është 16 për qind për të gjitha mallrat, pa marrë parasysh origjinën e tyre dhe 0 për qind për mallrat që i dedikohen eksportit, kurse kjo normë zbatohet që nga viti 2001.

Menderes Ibra është këshilltar në Ministrinë e Financave. Ai tha për REL se janë duke diskutuar për krijimin eventual të një norme tjetër më të ulët për disa produkte ushqimore, siç janë buka, kripa, qumështi e të tjera.

“Duhet pasur parasysh se ne nuk kemi asnjë vendim për këtë çështje. Jemi duke e analizuar këtë edhe në pikëpamje të ndikimit buxhetor…duhet ditur se nëse do të ketë rëne të TVSH-së në artikuj të caktuar ushqimorë, atëherë do të duhej që norma për artikuj të tjerë të rritej”, thotë Ibra.

Kohë më parë, Instituti Ballkanik i Politikave kishte filluar një iniciativë, në të cilën kërkohej heqja e TVSH-së për shportën ushqimore. Qëllimi i kësaj iniciative ishte heqja e TVSH-së për produktet bazike të shportës ushqimore, siç janë: buka, mielli, vaji, qumështi, sheqeri, kripa dhe mishi.

Drejtues të këtij instituti kishin theksuar se disa vende të Evropës kanë reduktuar tatimin për shportën ushqimore.

Sipas hulumtimit të tyre, Serbia dhe Kroacia normën tatimore e kanë 20 për qind, ndërsa tatimin për shportë ushqimore e kanë përkatësisht 8 dhe 5 për qind. Gjermania normën tatimore e ka 19 për qind, ndërsa tatimi për shportën ushqimore është 7 për qind.

Në Shqipëri, ndërkaq norma e TVSH-së është 20 për qind, pa ndonjë lirim për shportën ushqimore.

Ibra thekson se TVSH-ja në Kosovë është më e ulëta krahasuar me vendet e rajonit dhe më gjerë.

“Sistemi tatimor në Kosovë është i ndërtuar në atë mënyrë që të jetë një sistem tatimor më i thjesht dhe shkalla e TVSH-së në Kosovë është 16 për qind dhe është norma më e ulët e TVSH-së, jo vetëm në rajon, por edhe më gjerë”, tha ai.

Ministria e Financave, sipas tij, vazhdimisht i rishikon politikat fiskale në mënyrë që të jetë në funksion edhe të konsumatorëve, edhe të bizneseve. “Në kuadër të përcaktimit të normave tonë tatimore diskutojmë edhe me FMN-në”, sqaron Ibra.

Viteve të fundit, Kosova është përballur me rritje të vazhdueshme të çmimeve të produkteve dhe shërbimeve. Sipas të dhënave të Agjencisë së Statistikave të Kosovë (ASK), çmimet e konsumit në Kosovë janë ngritur për 2.6 për qind në muajin mars 2013, krahasuar me muajin mars 2012.