Kriza ekonomike bartet edhe në Kosovë

Edhe në Kosovë po vërehet një thellim i krizës ekonomike dhe financiare, që është rezultat i mungesës së investimeve të huaja dhe nivelit të lartë të importit

Në anketën e fundit të publikuar nga Programi për Zhvillim i Kombeve të Bashkuara në Prishtinë (UNDP), i quajtur Pulsi Publik, raportohet për rritje të pakënaqësisë së qytetarëve kosovarë sa i përket orientimit ekonomik. Shumica akuzojnë qeverinë për mungesë strategjie ekonomike.  

Sipas kësaj ankete të realizuar në fund të muajit mars dhe në fillim të muajit prill, të cilën e transmeton REL, 74 për qind e të anketuarve janë të pakënaqur me drejtimin aktual ekonomik, ndërsa vetëm 6 për qind janë të kënaqur ose shumë të kënaqur.

Edhe ekspertët e çështjeve ekonomike shprehen të pakënaqur me gjendjen ekonomike në Kosovë. Sipas tyre, rënie të aktiviteteve ekonomike ka në shumicën e vendeve të Evropës.

Mejdi Bektashi është profesor në Universitetin e Prishtinës dhe është një njohës i mirë i zhvillimeve ekonomike. Edhe në Kosovë, sipas tij, gjatë këtij viti po vërehet një thellim i krizës ekonomike dhe financiare, që është rezultat i mungesës së investimeve të huaja dhe nivelit të lartë të importit.

“Problemi nuk është vetëm në ekonominë e Kosovës, tashmë kemi atë reflektimin e krizës evropiane dhe botërore në Kosovë dhe problemi mund të thellohet. Posaçërisht u frikohem shqetësimeve apo problemeve sociale, të cilat mund të paraqiten për shkak të shkallës së lartë të papunësisë”, thotë Bektashi.

Shqetësimet sa i përket aktiviteteve ekonomike, nuk janë vetëm për Kosovën, por ka edhe në rajon dhe Evropë, thotë edhe eksperti tjetër i Ekonomisë, Naim Gashi.

Ai thotë se në këtë kohë, në shumë vende të Evropës ka rënie ekonomike, shkurtim të vendeve të punës, probleme këto nga të cilat nuk mund të anashkalohet as Republika e Kosovës.

 Ndryshe, në anketën e UNDP-së, përgjegjësinë për gjendjen e tashme ekonomike në vend, qytetarët ia atribuojnë Qeverisë së Kosovës. Por, Naim Gashi thotë se përveç autoriteteve qeveritare, përgjegjës është edhe komuniteti i biznesit.

 “Unë mendoj se fajtor individual në këtë aspekt nuk ka, të gjithë janë nga pak, edhe bizneset, Qeveria, komunat, por edhe donatorë ndërkombëtarë dhe mbështetës të Kosovës, për arsye se kanë disa obligime të dhëna, sa i përket Kosovës dhe duhet t’u përmbahen”, thekson Gashi.

Anketa është zhvilluar me 1290 qytetarë të Kosovës, të të dyja gjinive dhe në të gjitha komunat e Kosovëa. Mostra ka përfshirë  832 shqiptarë, 230 serbë dhe 228 pjesëtarë të  komuniteteve tjera që jetojnë në Kosovë.