Lajme

Ferizajasit po e “ndien” dorën e Zvicrës

Nuk ka qytetarë në rajonin Ferizajt që nuk e ka ndier ndihmën e qeverisë zvicerane. Kjo e fundit përveç investimeve milionëshe në rrugë, ka investuar edhe në ujësjellës

E martë, 7 Maj 2013 - 20:48 albinfo.ch
Qeveria e Zvicrës edhe një herë tregoi përkushtimin e saj për t’i ndihmuar qytetarët e Kosovës në krijimin e mirëqenies së tyre. Kësaj radhe përfitues nga qeveria helvetike ishte komuna e Ferizaj, respektivisht 11 fshatra të saj të cilët shumë shpejt do të bëhen me ujësjellës.
 
Të martën së fshatin Sazli të Ferizaj u inaugurua fillimi i punimeve për instalimin e rrjetit të ujësjellësit për 11 fshatra si dhe hapjen e puseve të reja për këtë ujësjellës.

Si rëndomë bartëse e këtij projekti është Qeveria e Zvicrës e përkrahur edhe nga Komuna e Ferizajt dhe Qeveria e Kosovës.

“Unë falënderoj Qeverinë zvicerane e cila po bën shumë në komunën e Ferizajt dhe komunat fqinje për të zgjidhur problemet me ujin”, tha Ramadan Hasani, zëvendësministër i Zhvillimit Ekonomik. Ai premto mbështetjen e vazhdueshme të MZHE-së për realizimin e projekteve të tilla.

Nga ana e tij, kryetari i Komunës së Ferizajt, Agim Aliu vlerësoi se inaugurimi i punimeve është një ditë e veçantë për banorët e 11 fshatrave të këtij rajoni (Sazli, Pojatë, Prelez i Jerlive, Prelez i Muhaxherëve, Surqinë, Bablak, Rahovicë, Mirosalë, Papaz dhe Softaj).

Ai tha se ky projekt është një bashkëinvestim që bëhen nga Komuna e Ferizajt së bashku me Qeverinë e Kosovës dhe me Qeverinë zvicerane, që ka për qëllim instalimin e rrjetit të ujësjellësit si dhe hapjen e puseve të reja për këtë ujësjellës, vlera e të cilit është 1.5 milion euro.

“Këto fshatra do të pajisen me sistem të ujësjellësit dhe me puse të reja dhe praktikisht ky është  një vend që përveç që do të ketë ujë të bollshëm, do të ketë edhe ujë kualitativ. Ne si komunë jemi të gëzuar që kemi gjetur si donatorë Qeverinë e  Kosovës dhe Qeverinë zvicerane, që është një donator i përhershëm”, tha Aliu.

 
Mirëpo nuk përfundoi me kaq investimi zviceran në komunën e Ferizajt. Prefekti Aliu tha se Qeveria e Zvicrës dhe Komuna e Ferizajt janë në përfundim e sipër të ndërtimit të rrugës “Rexhep Bislimi” që ka vlerën prej 7 milionë euro.
 
Ndërkaq, deputeti i Kuvendit të Kosovës nga komuna e Ferizajt, Elmi Reçica tha se po të mos ishte puna e mirë dhe efikase e qeverisë lokale, Qeverisë së Kosovës dhe MZHE-së, si dhe të gjithë atyre që janë duke u marr me këto angazhime nuk do të ndodhnin të gjitha këto investime.
 
Sipas tij, kjo që po fillon të bëhet sot do të jetë një nga investimet shumë të rëndësishme që i ka bërë Qeveria zvicerane këtu dhe që do të vazhdojë edhe në të ardhmen.     

 Të tjera nga Lajme

Rama për “Frankfurter Allgemeine Zeitung”: Sazani do të mbetet pronë e shtetit shqiptar

 E-Diaspora

 Jeta në Austri