Prezantohen ofertat verore 2013

Shqipëria, Mali i Zi dhe vendet tjera rajonale prezantuan ofertat turistike për opinionin kosovar. Në Ulqin, por edhe në bregdetin shqiptar do të ketë oferta shumë të mira në bregdet të pastër

Përfaqësuesit nga Shqipëria, Mali i Zi, Maqedonia, Turqia, Bullgaria dhe Greqia, po i prezantojnë në Prishtinë produktet e tyre turistike, në kuadër të guides vera 2013. Ky prezantim po bëhet në kuadër të edicionin e 10-të të Panairit Ndërkombëtar të Turizmit, Udhëtimeve dhe Gastronomisë që po mbahen në Pallatin e Rinisë.

Ky panair u organizua nga CEO – Congress & Event Organization, ndërsa pjesëmarrësit e vlerësuan si mundësi të mirë për prezantimin e ofertave të vendeve tjera, por edhe përurimin e turizmit dhe arsimit vendor.

Zëvendësministri i Tregtisë dhe Industrisë, Cuneyd Ustaibo, tha se përmes promovimit të vlerave të përbashkëta turistike realizohen edhe kontakte e miqësi mes njerëzve dhe turistëve të vendeve tona.

“Ministria e Tregtisë dhe Industrisë do të jetë gjithnjë në mbështetje të zhvillimit dhe bashkëpunimit mes vendeve tona në fushën e turizmit, sepse turizmi është shndërruar në industri të zhvillimit ekonomik që sjell të ardhurat tona kombëtare”, tha ai, raporton MTI.

Majlinda Lami nga Ministria e Turizmit së Shqipërisë, tha se tregu i vizitorëve nga Kosova radhitet i pari për numrin e turistëve që shkojnë në Shqipëri.

”Konsolidimi i ardhjeve nga Kosova do të nxisë dhe do të rrisë shkëmbimet e ndërsjella turistike midis Kosovës dhe Shqipërisë. Ne tashmë jemi pjesë e projekteve të përbashkëta, siç është “Majat e Ballkanit”. Desha të theksoj se në vitin 2012 numri i vizitorëve nga Kosova ka pjesën më të madhe të turistëve që vijnë në Shqipëri. Pra nga 4 milionë e 600 mijë që janë numri i turistëve, gati 2 milionë janë pushues nga Kosova”, tha ajo.

Gjithashtu edhe Komuna e Ulqinit prezantoi ofertat turistike për këtë vit. Kryetari i Ulqinit, Nazif Cungu, tha se brenda këtij viti janë përmirësuar shumë kushte në infrastrukturë.

Panairi i Edukimit edhe këtë vit do të vazhdojë të luaj rol të veçantë në promovimin e mundësive për arsim në degë të shumta, universitete dhe vende të ndryshme. Në këtë panair po marrin shumë universitete evropiane.

Përfaqësuesit e institucioneve të Kosovës në fushën  e arsimit vlerësuan se prezantimi i ofertave arsimore do t’iu shërbejë studentëve të përcaktohen rreth studimeve të tyre. Pjesëmarrës në panair janë edhe Agjencia e Akreditimit të Kosovës të cilët do t’i njoftojnë nxënësit mbi universitetet e akredituara në vend.

Panairet do të qëndrojnë të hapura deri më 19 prill nga ora 10:00 deri në 18:00.