Tensione te “Kroi i Vitakut”

Ministri Rexhepi tha se Njësia Speciale “ROSU” do të intervenojë në veri vetëm atëherë kur rrezikohet siguria e qytetarëve të kësaj ane

Ndërtimi i shtëpive të shqiptarëve në lagjen “Kroi i Vitakut” në veri të Mitrovicës është ndërprerë për shkak të tensioneve në këtë zonë. Situata u tensionua pasi që një grup serbësh të organizuar penguan dhunshëm rindërtimin e shtëpive, duke gjuajtur me gurë mbi shqiptarët dhe njësitë policore.

Për të evituar eskalimin e dhunës, në këtë lagje të veriut të Kosovës intervenuan njësitet speciale të Policisë së Kosovës (ROSU) të cilat qëndruan në këtë rajon deri në orët e vona të të enjtes. Po ashtu në këtë lagje qëndroi edhe ministri i Rendit, Bajram Rexhepi dhe komandanti i Policisë, Shpend Maxhuni.

“Punimet për rindërtimin e shtëpive në këtë lagje do të vazhdojnë, por kërkojmë nga EULEX-i dhe KFOR-i të krijojnë ambient të sigurt për vazhdimin e punimeve”, tha ministri Rexhepi, sipas të cilit, Njësia Speciale “ROSU” do të intervenojë vetëm atëherë kur rrezikohet siguria e qytetarëve të kësaj ane.

Zëdhënësi i Policisë rajonale në Mitrovicë, Besim Hoti, i tha REL-sit se pjesëtarët e njësitit special “ROSU” janë tërhequr në orët e vona të pasdites.

“Njësitet policore speciale kanë qëndruar deri në orët e vona të pasdites në afërsi të vendit të ngjarjes, përkatësisht fshatin Suhadoll në rast të nevojës së aktivizimit, mirëpo një gjë e tillë nuk është paraqitur si e nevojshme”, tha Hoti.

Serbët e veriut të Kosovës po e kundërshtojnë rindërtimin e shtëpive të djegura gjatë luftës. Ata po thonë se autoritetin për dhënien e lejeve për rindërtim në këtë rajon e ka vetëm UNMIK-ut. Ndërsa kryeministri Hashim Thaçi i ka dhënë UNMIK-ut që të rrijë larg nga veriu.

Krstimir Pantiq, ndërkaq është kryetar i komunës paralele të Mitrovicës së veriut. Ai tha se pronarët që po rindërtojnë shtëpitë te “Kroi i Vitakut”, nuk kanë leje për këtë veprim.

“Kjo ka qenë një nga arsyet pse serbët kanë vendosur spontanisht të mblidhen e të protestojnë kundër aktivitetit ilegal”, u shpreh Pantiq.

Misioni i NATO-s, si përgjegjës i parë për sigurinë në veri, e cilësoi të qetë situatën aktuale atje. Zëdhënësi i KFOR-it, Uwe Nowitzki, tha se janë shtuar patrullat e ushtarëve të misionit në atë pjesë. “Mund të them se kemi patrulla shtesë atje. Po, kjo është e vërtetë”, theksoi Nowitzki.