Blerim Shala, koordinator i dialogut

Kryeministri Thaçi ka mirëpritur dekretimin nga presidentja e Kosovës të Blerim Shalës në pozitën e koordinatorit politik në dialogun me Serbinë

Presidentja e Kosovës Atifete Jahjaga emëroi Blerim Shalën, nënkryetar i Aleancës për Ardhmërinë e Kosovës (AAK), koordinator politik për dialogun Kosovë-Serbi. Ky vendim i presidentes kosovare , është përshëndetur nga kryeministri Hashim Thaçi.

“Presidentja Atifete Jahjaga, bazuar në Kushtetutën e Kosovës, dekretoi Blerim Shalën, koordinator politik në dialogun për normalizimin e marrëdhënieve ndërmjet Republikës së Kosovës dhe Republikës së Serbisë”, thuhet në njoftimin lëshuar nga Presidenca .

Ndërkohë, kryeministri Thaçi ka mirëpritur dekretimin nga Presidentja e Kosovës, të Blerim Shala në pozitën e koordinatorit politik në dialogun me Serbinë. Shala ka qenë koordinator i Ekipit të Unitetit në negociatat e zhvilluara mes Kosovës e Serbisë në Vjenë, para shpalljes së pavarësisë.

Lideri i Lëvizjes Vetëvendosje, Albin Kurti ka thënë se emërimi i Shalës si koordinator në bisedime, është lajm i keq për vendin.

“Është e qartë se personi i cili u emërua për koordinator të dialogut politik ka treguar në një intervistë në gusht të këtij viti se është i gatshëm për kompromise dhe kësisoj ende pa filluar dialogu politik, në kohën kur edhe Qeveria e Kosovës nuk deklarohej për dialog politik. Ai ishte deklaruar për kompromis në dialogun politik”, tha Kurti.

Emërimi i Shalës, sipas Kurit, e dobëson edhe më tej pozitën e Kosovës. “Jam i bindur që po përshpejtohet kompromisi i ardhshëm ku Serbia fiton, e Kosova dëmtohet”, ka thënë ai.