“Matanë malit”, albumi i tretë i Elina Dunit

“Matanë malit” është titulluar albumi i tretë i këngëtares së re shqiptare, Elina Duni, i cili do të publikohet gjatë këtij muaji

 Album i këngëtares së re shqiptare, Elina Duni, është realizuar me labelin legjendar të muzikës xhaz, “ECM”, ndërsa do të hidhet në treg më 21 shtator në Zvicër dhe Gjermani, e më 8 tetor në Francë e Shtete të Bashkuara të Amerikës.

Këtë vjeshtë, Elina, shqiptarja që po mahnit artdashësit, do të zhvillojë turne në Evropë dhe SHBA, me muzikën që paraqet rikthim te burimet e saj muzikore, një kombinim mes këngëve popullore ballkanike dhe muzikës xhaz.

Elina, së bashku me të ëmën, Besa Myftiu, kishte emigruar nga Shqipëria në Gjenevë, kur ende nuk kishte mbushur 11 vjet. Në këtë qytet ajo ka studiuar pianon klasike në “Conservatoire de Musique de Genève“ dhe në „Collège de Saussure“, por gjatë asaj kohe ka zbuluar edhe pasionin e saj për xhazin.

Një kohë ka jetuar dhe studiuar në Nju Jork ndërsa me kthimin në Zvicër, në vitin 2004, Duni mbaroi konservatorin e muzikës, drejtimin për xhaz, në Bernë. Në të njëjtën kohë ajo iu kushtua xhazit, duke krijuar kuartetin e saj me Colin Valon, Bänz Oester dhe Norbert Pfammatter.

Prej disa vitesh Elina Duni me kuartetin është  e pranishme dhe shumë e vlerësuar në skena të ndryshme të Zvicrës, Gjermanisë, Austrisë, Shqipërisë, Kosovës etj.