EULEX-it i vazhdohet mandatin deri më 2014

Këshilli i Bashkimit Evropian ka vendosur të martën në Bruksel që t’i zgjatë edhe për dy vjet mandatin misionit EULEX në Kosovë

Ndërkohë është aprovuar edhe ristrukturimi i këtij misioni duke përfshirë edhe shkurtimin prej 900 zyrtarësh.

Sipas vendimit të Këshillit të BE-së, misioni për sundim të ligjit në Kosovë, brenda 10 ditësh do të ketë 700 ndërkombëtarë dhe 200 vendorë më pak, ndërsa për stafin e mbetur ka ndarë një buxhet prej 111 milionë eurosh.

Përfaqësuesja e lartë e Bashkimit Evropian, Catherine Ashton deklaroi se e mirëpret një vendim të tillë për zgjatjen e mandatit të misionit të EULEX-it deri në qershor të 2014-ës.

Të enjten e kaluar, Komiteti për Punë të Jashtme i Parlamentit të Evropës, ka vendosur që të ristrukturojë EULEX-in. Nga tri shtyllat, Policia, Dogana dhe Drejtësia të reduktohen në dy shtylla të reja, fuqizimi dhe fuqitë ekzekutive.

 Ndryshe EULEX-i gjatë tri viteve të funksionimit nuk ka bërë ndonjë punë që mbahet mend. Mungesa e rezultateve dhe procese gjyqësore që rregullisht kanë përfunduar pa rezultate kanë ndikuar tejmase keq në imazhin e këtij misioni.