Bashkimi Evropian kritikon Nikoliqin

Bashkimi Evropian i ka bërë të qartë presidentit  të ri të Serbisë, se nuk do ta tolerojë mohimin e gjenocidit të ushtruar nga forcat serbe ndaj myslimanëve të Srebrenicës.

“Bashkimi Evropian kundërshton çdo përpjekje për të rishikuar historinë”, ka deklaruar zëdhënësja e KE-së, Pia Ahrenkilde për agjencinë “DPA”.

Zëdhënësja ka nënvizuar se vendimet e dhëna nga gjykata ndërkombëtare e Hagës e përcaktojnë ngjarjen e Srebrenicës si një gjenocid të pastër.

“Vrasjet e korrikut të 95-ës në Srebrenicë ishin një krim i rëndë kundër tërë njerëzimit. Këto ngjarje nuk duhet t’i harrojmë dhe duhet të bëjmë që të mos ndodhin kurrë më”, ka shtuar Ahrenkilde.

Reagimi i Brukselit vjen pasi presidenti i ri serb, Tomisllav Nikoliq deklaroi javën e kaluar se, në Srebrenicë nuk ka pasur gjenocid, por vetëm një krim të rëndë lufte.

“Nuk kishte gjenocid në Srebrenicë. Atje ka pasur një krim të rëndë lufte nga disa serbë, të cilët duhet të gjenden, të gjykohen dhe të ndëshkohen”, tha Nikoliq për një televizion malazez.

“Është shumë e vështirë të akuzosh dikë dhe të provosh përpara një gjykate se një ngjarje e caktuar klasifikohet si genocid”, kishte deklaruar Nikoliq.