1 milionë shqiptarë emigrantë në BE

Shqipëria është renditur në vend të tretë për numrin më të lartë të banorëve të huaj të BE-së

Komisionerja e BE-së, CeciliaMalmstrom  ka theksuar se gjatë 2011, Bashkimi Evropian priti pothuajse 10 % të emigrantëve të botës.

Kjo është rreth 20 milionë njerëz, ose 4% e popullsisë së BE-së.

Shqipëria në këtë raport përmendet vetëm një herë, duke u renditur në vend të tretë për numrin më të lartë të banorëve të huaj të BE-së, referuar të dhënave të EUROSTAT, transmeton Top-Channel.

“Grupet me numrin më të lartë të rezidentëve me kombësi nga vende të treta në 2009 ishin  Turqia (përafërsisht 2.4 milionë), Maroku (gati 1.8 milionë) dhe Shqipëria (përafërsisht 1 milionë banorë),” thuhet në raportin e KE-së.

“Për azilin, ne duhet të vazhdojmë të përmbushim detyrën tonë për t’i dhënë strehë atyre që kërkojnë mbrojtje dhe të kompletojmë sistemin e përbashkët evropian për azilin gjatë 2012-s, siç kanë rënë dakord vendet anëtare”,ka thënë Malmstrom.

“Është e qartë se një nga dobësitë e sotme të Shengenit është se vlerësimi  është rishikuar tepër dhe për pasojë ne nuk kemi qenë në gjendje për të vepruar në kohë ndaj dobësive të mundshme në menaxhimin e kufirit të një vendi”, shtoi Malmstrom.

Raporti vjetor për emigracionin dhe azilin në BE gjatë 2011 shoqërohet dhe me sondazhet e bëra nga Eurobarometër, ku rezulton se 53% e qytetarëve evropianë mendojnë se emigracioni  pasuron vendet e BE-së në mënyrë ekonomike e kulturore.