Krijohet kompania ajrore ballkanike?

Në kuadër të debatit do të jetë edhe krijimi i një kompanie ajrore të përbashkët për Bosnjën, Maqedoninë dhe Kosovën

Kompanitë ajrore Montenegro Airlines, Adria, Croatia Airlines dhe JAT takohen nesër në Mal të Zi për të debatuar masat që mund të ndërmerren për reduktimin e shpenzimeve. Në kuadër të debatit do të jetë edhe krijimi i një kompanie ajrore të përbashkët për Bosnjën, Maqedoninë dhe Kosovën, njofton portali Austrianaviation.net.Çmimet e larta të lëndës djegëse, tregjet relativisht të vogla si dhe konkurrenca e kompanive ajrore Lowcost (me çmime të ulëta) ndikojnë negativisht në punën e kompanive ajrore të vendeve të Evropës juglindore. Në kuadrin e një strategjie të re, provojnë tash katër kompanitë e futura në borxhe të vendeve të ish Jugosllavisë, që përmes një bashkëpunimi më të ngushtë t`i ikin fatit të keq të kompanisë Malev, që ka përjetuar në muajin shkurt.Në kuadrin e strategjisë së debatuar mendohet që në pesë deri tetë vitet e ardhshme do të ishte e dëshirueshme të krijohet një airline e përbashkët për Bosnjën Maqedoninë dhe Kosovën. Por për menaxherin e JAT-it një gjë e tillë është për fat të keq aktualisht pak realiste, përderisa kompanitë ajrore nuk blihen nga ndonjë kompani ajrore ndërkombëtare. Qeveria e Serbisë po kërkon prej kohësh të gjejë ndonjë investitor për JAT-in, po kështu edhe Adria është në kërkim të investitorëve.  Ndërkaq, për Croatia Airlines një bashkim me kompanitë ajrore ish jugosllave aktualisht nuk mund të jetë çështje bisedimesh. E vetmja mundësi që mund të shqyrtohet është bashkimi me kompaninë Adria, përfundon Austrianaviation.net.