Partitë pirate, nën një flamur të përbashkët

Partitë pirate të vendeve të ndryshme të Evropës mblidhen “nën një flamur të përbashkët” në një konferencë të mbajtur këtë fundjavë në Pragë. Disa zviceranë janë gjithashtu pjesëmarrës të saj.

Delegatët e Partisë Pirate International (PPI) të njëzet vendeve, duke përfshirë edhe Zvicrën, zhvilluan një bisedë për përgatitjen e një programi të përbashkët për zgjedhjet e ardhshme evropiane, por edhe për një qasje të përbashkët kundër marrëveshjes ndërkombëtare të falsifikimit (Acta).

“Konferenca në Pragë duhet të jetë një hap i parë për të nisur një fushatë të përbashkët për zgjedhjet evropiane të vitit 2014”, tha zëvendëskryetari i Partisë Pirate çeke, Mikulas Ferjencik.

Afro 200 delegatë morën pjesë në konferencën e PPI-së, një organizatë ombrellë botërore e partive pirate. Sa për kujtesë, Partia e parë pirate u formua në vitin 2006 në Suedi.

“Për një qasje të lirë dhe të barabartë në kulturë”

Partitë pirate janë për qasje të lirë dhe të barabartë për të gjithë në kulturë, dije dhe informacion, prandaj edhe kanë bërë thirrje për një reformë radikale të të drejtës së autorit. Lëvizja pirate mbledh aktualisht dy deputetë evropianë, suedezen Amelia Andersdotter, e pranishme në Pragë si dhe Christina Engstrom.

“Ka shumë çështje të rëndësishme të integrimit, për të cilat ne kemi nevojë të bisedojmë, e jo vetëm në një perspektivë për zgjedhjet evropiane, por në përgjithësi”, ka theksuar për media znj. Andersdotter.

Në kuadër të kësaj konference të mbajtur në Pragë, disa seminare janë organizuar për të strukturuar një perspektivë evropiane për vitin 2014, si dhe për të përpiluar një fushatë të përbashkët.

“Të bëjmë politikë të besueshme”

“Lëvizja pirate (hacker) në tërësinë e saj parashikon të marrë vende qoftë në nivelin komunal, atë rajonal, qeveritar dhe detyrimisht edhe në nivelin evropian”, shpjegon Pascal Gloor, nënkryetar i Partisë Pirate zvicerane.

Si pas z. Gloor, sot kemi të bëjmë me “një rini që nuk beson në politikë, që nuk beson në politikanët me kostume që vetëm japin fjalë të thata. Pikërisht Lëvizja pirate ka lindur për t’ iu përgjigjur kësaj nevoje, për të treguar se ne mund të bëjmë politikë të besueshme”.

Konferenca gjithashtu do të fokusohet për të ndërtuar një qasje të përbashkët ndaj Acta-s dhe direktivave evropiane për ruajtjen e të dhënave (Data Retention Directive es). “Ne nuk jemi këtu që t’u japim urdhra njerëzve, por për të nxitur vëmendjen e tyre në lidhje me marrëveshjen “Acta”, e cila kërcënon lirinë e informacionit, por edhe lirinë e shprehjes”, tregon z.Magnin.

Çfarë është Acta?

E negociuar mes BE-së, Shteteve të Bashkuara, Japonisë, Kanadasë, Zelandës së Re, Australisë, Singaporit, Koresë së Jugut, Marokut, Meksikës dhe Zvicrës, Acta synon të luftojë kundër shkeljes së gjerë të shkarkimeve të paligjshme në internet. Kundërshtarët kanë frikë se kjo marrëveshje do të kufizojë liritë në internet.