Lajme

Lehtësira për biznes, por pak investues

E martë, 10 Prill 2012 - 7:19 albinfo.ch

Shteti ka nisur thjeshtëzimin e procedurave për të bërë biznes. Kompania regjistrohet pa taksa e pagesa tjera, por investime nuk ka. Edhe ato që janë, duket se më shumë mendojnë të largohen.

Qeveria e Kosovës ka nisur të krijojë lehtësira për të gjithë ata që duan të hapin ndonjë biznes.

Në përpjekje për të bërë vendin sa më atraktiv, Ministria e Tregtisë dhe Industrisë ka filluar të shkurtojë procedurat burokratike.

Por pavarësisht kësaj, duket se investuesve të huaj, pak u mbushët mendja se në këtë vend mund të fitojnë nga të bërit tregti.

Kompanitë e mëdha që kanë investuar numërohen në gishta e ndërkohë ka të tilla si ajo ndërtimore nga Austria, “Strabag”, e cila thuhet se po e braktis Kosovën.

Kompania e cila në vitin 2006 kishte blerë njërën nga guroret më të mëdha të ish-Jugosllavisë, në afërsi të Drenasit, mendohet se për shkak të konkurrencës jo të ndershme dhe ndikimeve politike, ka nisur të shes të gjitha makineritë për t’u larguar nga vendi.

Në fakt, regjistrimi i bizneseve tashmë është procedurë shumë e thjeshtë. Por regjistrimi nuk do të thotë se dikush edhe do të investojë.

Arta Istreﬁ, një nga këshilltaret për media e ministres së Tregtisë Mimoza Kusari – Lila, ditë më parë ka deklaruar se investimet më të mëdha në Kosovë vijnë nga Turqia, Gjermania, Britania e Madhe, Zvicra, Maqedonia, Austria dhe Sllovenia.

Në përpjekje për të joshur investuesit e jashtëm, duket se i gjithë zinxhiri përkatës shtetëror është vënë në lëvizje.

Lehtësira janë duke u bërë edhe në sistemin e Doganave të Kosovës. Adriatik Stavileci, zëdhënës i këtij institucioni ka konfirmuar për Albinfo.ch se pas reduktimit të dokumenteve për import, që ka ndodhur në fillim të këtij viti, Dogana e Kosovës, nga java e kaluar ka vendosur që kompanitë të cilat importojnë apo eksportojnë, nuk janë më të detyruara të bëjnë marrjen e certifikatave të import-eksportit.

Sipas tij, në drejtorinë e Doganës së Kosovës, deri më tani janë lëshuar certifikata import-eksportit për bizneset, të cilat fillimisht janë regjistruar pranë MTI-së dhe Administratës Tatimore të Kosovës.

“Konform dispozitave të Kodit Doganorë dhe të Akcizave lidhur me regjistrimin e subjekteve ekonomike është marre vendim që nga data 2 prill 2012, të gjitha subjektet ekonomike që regjistrohen pranë agjencionit për regjistrim të biznesit dhe Administratë Tatimore të Kosovës-se, tash e tutje nuk do të regjistrohen edhe pranë zyrës për regjistrim të bizneseve në Doganën e Kosovës”, thotë Stavileci për Albinfo.ch.

Tentimi që të krijohen lehtësira për të bërë biznes, ka futur në garë edhe komunat e vendit. Duke shfrytëzuar kompetencat që u lejon ligji, ato kanë nisur se cila më përpara do të krijojë kushte sa më të thjeshta në këtë drejtim.

E para që mori mirënjohje si komuna më ë mirë në krijimin e lehtësirave për të bërë biznes, doli të jetë Mitrovica.

Asociacioni i Komunave të Kosovës, i ka ndarë edhe mirënjohje kësaj komune, duke e quajtur si një pikë referimi në vend, sa i përket shkurtimit të procedurave për regjistrimin e një biznesi.

Gani Shala, Drejtor për Financa dhe Zhvillim Ekonomik në Komunën e Mitrovicës, ka deklaruar se Qendra komunale bizneseve e quajtur “One to shop”, është formuar në bazë të një memorandumi mirëkuptimi në mes të Zyrës për regjistrimin e biznese dhe Komunës së Mitrovicës.

“Krijimi i këtyre qendrave nëpër komuna dhe konkretisht kjo në Mitrovicë ka shkurtuar procedurat dhe kohën e regjistrimit të një biznesi”, ka thënë ai.

Derisa në vitin 2010 janë regjistruar 156 biznese, në vitin 2011 në Mitrovicë janë regjistruar 347 të tilla.

E në garën se kush më shumë do të paraqesë lehtësirat që ofron shteti për të bërë biznes, duket se ka përfshirë të gjithë zyrtarët e lartë të vendit.

Besim Beqaj, ministër i Zhvillimit Ekonomik ka deklaruar se Qeveria e Kosovës, është jashtëzakonisht e angazhuar që të bëjë eliminimin e të gjitha barrierave të mundshme, për të hyrë në treg.

Sipas tij, Qeveria e Kosovës, ka vënë para vetës një detyrë jashtëzakonisht të rëndësishme, që në fokus të parë të vihet zhvillimi ekonomik i vendit, e të ruhet stabiliteti makrofiskal, në kohëra krizash.

Pavarësisht këtyre përpjekjeve, imazhi jo i mirë i vendit në botë i krijuar nga hetime, dyshime e madje deklarime edhe të Ambasadorëve të huaj në vend për nivelin e lartë të korrupsionit, dyshohet e mban larg investitorët.

Kjo ka bërë që në vend, të mbetet ende i lartë niveli i papunësisë, madje nga 30 deri në 45 përqind.