Kosovarët me pagën mesatare më të ulët në Evropë

Krahasuar me vendet e rajonit, si Shqipëria, Maqedonia, apo Mali i Zi, Kosova ka pagën mesatare më të voglën në rajon

Paga mesatare në sektorin publik në Kosovë, sipas të dhënave të dhjetorit të vitit 2011 të Agjencisë së Statistikave të Kosovës, është 368 euro.

Drejtori i Departamentit të Politikave Sociale në Agjencinë e Statistikave të Kosovës, Bashkim Bellaqa, thotë për Radion Evropa e Lirë se paga mesatare në sektorin publik nga viti 2007 deri në vitin 2011, është rritur për 169 euro, shprehur në përqindje 84 për qind.

Njohësit e çështjeve ekonomike, ndërkohë kanë kërkuar që pagat të caktohet në bazë të nivelit të cmimeve sepse në Kosovë, proporcioni në mes nivelit të çmimeve dhe pagave është shumë i lartë.

Ata kanë theksuar se pagat mesatare në Kosovë janë të nivelit të ulët, madje nuk mjaftojnë për një jetë të dinjitetshme.

Krahasuar me vendet e rajonit, si Shqipëria, Maqedonia, apo Mali i Zi,  sipas drejtorit të Departamentit të Statistikave Sociale, Bashkim Bellaqa, Kosova ka pagën mesatare më të voglën në rajon.

“Kosova mbetet me pagën mesatare më të ulëtën në krahasim me Evropën Juglindore, por prapë duhet të theksojmë se këto krahasime nuk janë ekzakte, për shkak se të gjitha vendet kanë boshllëqe në të dhënat e pagave dhe baza për llogaritjen e pagave nuk është unike. Shifrat për Kosovën i referohen vetëm sektorit publik”, sqaron Bellaqa.

Me një vendim të Qeverisë së Kosovës, pagat në sektorin publik ishin rritur në vitin 2011. Sipas këtij vendimi, i cili kishte hyrë në fuqi më 1 janar të vitit 2011, punonjësit në sektorin publik kanë filluar të marrin paga me ngritje nga 30 deri në 50 për qind.

Drejtori ekzekutiv në Institutin për Studime të Avancuara (GAP), Agron Demi, thotë për Radion Evropa e Lirë thotë se pas kësaj rritjeje të pagave në sektorin publik, kishte pasur ngritje të çmimeve të konsumit dhe një mori vendime të Qeverisë së Kosovës, të cilat kishin ndikuar që kjo pagë mesatare mos të reflektojë në rritjen e fuqisë blerëse.

Ndryshe, të dhënat e fundit të publikuara nga Agjencia e Statistikave të Kosovës, tregojnë se shporta e konsumit u shtrenjtua për rreth 3 për qind në muajin janar, në krahasim me fillimin e vitit të kaluar, ndërsa në krahasim me dhjetorin, artikujt e nevojshëm të konsumit u shtrenjtuan për 0.7 për qind.