USAID-i dhuron mbi 40 milionë dollarë për bujqësinë kosovare

Ministri i MBPZHR-së, Blerand Stavileci, zv.dministratorja e USAID-it për Evropë dhe Azi, Paige Alexander, dhe drejtoresha e USAID-it në Kosovë, Maureen Shauket, kanë vizituar kompaninë “Agrovizioni” në Llugaxhi të Lipjanit.

“Me iniciativa të reja të përkrahjes së fermerëve që nuk kanë qenë më parë, USAID-i mbetet një hap para donatorëve të tjerë”, ka deklaruar Stavileci.

Kurse, Paige Alexander tha se USAID-i i ka ofruar sektorit të bujqësisë një përkrahje prej më shumë se 40 milionë dollarë deri më tash dhe ka organizuar vizita të ndryshme studimore për fermerë. “Ndjehem mirë që investimet e USAID-it dhe bashkëpunimi me ministrinë është duke dhënë rezultate shumë të mira në Kosovë. Këtu tani kemi filluar edhe projektin e ri “Programi Mundësitë e Reja për Bujqësi”, i cili do t’i nxisë fermerët drejt avancimit të standardit të cilësisë dhe kompletimit të tregut me prodhime cilësore. Vlera e këtij projekti është rreth 16 milionë dollarë”, ka deklaruar Alexander.

Pronari i kompanisë “Agrovizioni”, Rexhep Spahiu ka thënë se prej vitit 2008 ka filluar të mbjellë pemë dhe perime dhe që kësaj veprimtarie i ka hyrë me seriozitet të madh.

“Në fillim kemi startuar me 1.5 ha me mollë, ndërsa tani kemi 13 ha. Me përkrahjen e USAID-it do të rritemi këtë vit, do të mbjellim edhe dredhëz edhe dardhë. Ministria e Bujqësisë na ka përkrahur gjithherë me 50 për qind dhe u jemi shumë mirënjohës”, ka deklaruar Spahiu.

Sipas tij, për produktet përpos në tregun e brendshëm, kanë kërkesa t’i shesin edhe në tregun e Shqipërisë dhe në tregje tjera.