Mbërrijnë në Romë abetare e libra të tjerë për mësimin e shqipes

Librat do t’u jepen falas shoqatave që organizojnë kurse të gjuhës shqipe

Ambasada e Shqipërisë në Romë njofton të gjitha shoqatat se Instituti i Diasporës në Ministrinë e Jashtme i ka nisur një sasi librash shkollorë për mësimin e gjuhës shqipe. Janë Abetare, të mësojmë gjuhën amtare dhe kulturën shqiptare 1, 2 dhe 3, si dhe Fletore pune që të gjithë libra të dobishëm për mësimin e shqipes jashtë atdheut.

Lajmi është shumë i mirë për të gjitha shoqatat që sot organizojnë kurse të mësimit të gjuhës shqipe si „Scanderbeg e Parmës“ apo „Skënderbeu i Fermos“, DEA e Cecina-s apo“ ASAT„ e Triestes, por mund të vlejë si nxitje për hapje kursesh të mësimit të shqipes edhe në qytete të tjera me përqendrim të lartë emigrantësh shqiptarësh.“Libra të tillë të konceptuar për fëmijët që mësojnë gjuhën shqipe jashtë atdheut, i kishim kërkuar prej vitesh – thotë ambasadori Llesh Kola për portalet në gjuhën shqipe në Itali.

 „Jemi shumë të kënaqur që më në fund na u sollën, në këtë mënyrë mund t’u japim mbështetjen tonë të gjithë atyre që kanë hapur apo duan të hapin kurse të gjuhës shqipe e të kulturës shqiptare në qytete të ndryshme të Italisë”, tha ai.

“Lajmi i krijimit të këtij fondi në ambasadë është shumë pozitiv“, ka  thënë  Durim Lika i shoqatës „Scanderbeg“ të Parmës. 

„Libra si këta i kemi kërkuar që kur kemi hapur shkollën tonë në Parma e deri më sot i kemi blerë dhe fotokopjuar vetë. Do të gjejmë mundësinë të shkojmë sa më parë në ambasadë për të tërhequr kopjet që na nevojiten”, ka deklaruar Lika.

Të gjitha shoqatat e interesuara për të pasur libra nga ky fond duhet të paraqesin projektin e kursit të shqipes dhe të kërkojnë numrin e librave që u nevojitet duke iu drejtuar Ambasadës Shqiptare në Itali.