Hajni i ndershëm

Pasi që në telefonat e vjedhur mobilë gjen pornografi me fëmijë, hajni vendos të denoncojë pronarin e telefonave që kishte vjedhur

Një hajn 46 vjeçar në Ballarat të Australisë, pasi „kryen punën“ e tij, gjegjësisht vjedh një kuletë dhe dy telefona mobilë, bie në dilemë të madhe! Në telefonat e vjedhur ai gjen se pronari kishte shkarkuar filma me pornografi fëmijësh.

Në dilemën: t`i fshijë filmat dhe t`i marrë telefonat, apo ta paraqesë pronarin, fiton e dyta. Hajni paraqitet në polici.

Gjyqtarja e lavdëron hajnin dhe i thotë se ka bërë pikërisht veprimin e duhur. Sigurisht, duke pasur parasysh veprimin e dytë, atë të denoncimit të pronarit të telefonave me material pornografik.

Por, kishte vazhduar ajo: “Ju keni pasur guximin që të denonconi, duke e ditur se po rrezikoni të humbni lironë”. Dhe pikërisht kjo kishte ndodhur. Ai u dënua për vjedhje, me një muaj burg dhe me xhobë prej 400 dollarësh.