Ngadalësohet rritja ekonomike në Maqedoni

Në 2011 ekonomia në Maqedoni u rrit për 3,3 për qind, kurse shkalla mesatare vjetore e inflacionit ka qenë 3,9 për qind

Guvernatori i i Bankës Popullore në Maqedoni, Dimitar Bogov ka bërë të ditur se për këtë vit pritet që rritja e prodhimit bruto vendor të jetë 2,4　 për qind ose 0,6 për qind më pak se projeksioni i mëparshëm　i bërë kah mbarimi i nëntorit.

Sipas tij, ekonomia filloi të ngadalësohet sepse kishte më pak kërkesë të prodhimeve tona, por edhe dukshëm u rrit importi i lëndëve të para dhe energjisë, raporton ALSAT-m. Sipas Bogov, nëse nevojitet do të ketë edhe shtrëngim të politikës monetare.

Inflacioni pritet që të jetë 2 për qind. Për shkak të pasigurisë në eurozonë, BP e Maqedonisë regjistroi zvogëlim të depozitave devizore, kurse po rritet kursimi në denarë. Rezervat devizore arritën 2 miliardë e 69 milion euro kah mbarimi i vitit 2011 ose u rritën për 355 milion euro.　

Ky nivel i rezervave devizore u mbajt edhe deri në mbarim të janarit. Sektori bankar është stabil ndonëse po rriten kreditë që qytetarët dhe firmat nuk mund t’i kthejnë.

Në 2011 ekonomia në Maqedoni u rrit për 3,3 për qind, kurse në pajtim me parashikimet, është realizuar shkalla mesatare vjetore e inflacionit prej 3,9 për qind.