Ambienti i pafavorshëm dëbon investitorët nga Kosova

Autoritetet kosovare vazhdimisht kishin deklaruar se do të punojnë për krijimin e një ambienti të favorshëm për investitorët e huaj

Tregu i vogël, imazhi i keq në botë, proceset e stërzgjatura të privatizimit, janë vetëm disa faktorë që ndikojnë në mosardhjen e investitorëve të huaj në Kosovë, thonë njohës të çështjeve ekonomike në Prishtinë. Gjithashtu, sipas tyre, edhe jostabiliteti politik dhe ekonomik në vend, shprehen negativisht në tërheqjen e investitorëve të huaj.

Eksperti i çështjeve ekonomike, Lekë Musa, thotë se komuniteti i investitorëve kërkon një treg atraktiv, e që kjo, siç thekson Musa, mungon në Kosovë.

Një element tjetër që ka ndikuar në dëbimin e investitorëve të huaj, sipas Lekë Musës, janë edhe proceset e stërzgjatura të privatizimit. Ai thekson se në sektorin e minierave, Kosova ka potenciale të jashtëzakonshme për investime, por që Qeveria e Kosovës, deri më tani nuk ka bërë asgjë për tërheqjen e investitorëve.Në anën tjetër, autoritetet kosovare vazhdimisht kishin deklaruar se do të punojnë për krijimin e një ambienti të favorshëm dhe të sigurt për investitorët e huaj, por, që sipas ekspertëve të çështjeve ekonomike, është bërë shumë pak në këtë drejtim.

Eksperti i çështjeve ekonomike, Milazim Abazi, thotë për Radion Evropa e Lirë se pa ndryshimin e politikave ekonomike në Kosovë, nuk do të mund të ketë investime ndërkombëtare të drejtpërdrejta.Përveç ambientit të pafavorshëm biznesor, sipas ekspertit të çështjeve ekonomike, Milazim Abazi, investimet e huaja të drejtpërdrejta në Kosovë mungojnë edhe si pasojë e krizës ekonomike në eurozonë. Abazi thekson se çdo herë, në kriza të tilla ekonomike globale, investitorët e huaj hezitojnë të investojnë jashtë vendit të tyre.Sipas një raporti të Bankës Qendrore të Republikës së Kosovës, në vitin 2007 investimet e huaja të drejtpërdrejta në vend kanë qenë 421 milionë euro; më 2008, investimet kanë qenë 355 milionë euro; ndërsa në vitin 2009 vetëm 310 milionë euro, në vitin 2010, investimet kanë rënë në 265 milionë euro, kurse në gjashtëmujorin e parë të vitit 2011, investimet e huaja në Kosovë kanë qenë 157 milionë euro. /Albinfo.ch & REL /