Dështon sërish seanca e Kuvendit

Mungesa e deputetëve të PAN-it ka bërë që edhe njëherë të shtyhet mbledhja konstituive e Kuvendit të Kosovës

Në mungesë të deputetëve të koalicionit PAN, përveç deputetit Milaim Zeka dhe deputetëve të minoriteteve  ka dështuar seanca e tretë e Kuvendit ku do të duhet të zgjidheshin Kryetari dhe Kryesia e legjislativit kosovarë.

Deputeti i Lëvizjes Vetëvendosje, Glauk Konjufca, ka shprehur edhe një herë qëndrimin e kësaj partie kundër zgjedhjes së Kadri Veselit për kryetar të Kuvendit, ndërsa ka thënë se koalicioni PAN nuk i ka numrat për zgjedhjen e kreut të Kuvendit.

“Kjo pamundësi i ka arsyet e veta. Kadri Veseli nuk përbën një figurë e pranueshme që do të ishte urë lidhëse ndërmjet grupeve parlamentare në Kuvend. Tashmë është bërë e qartë se ky njeri nuk mund të zgjidhet kryetar i Kuvendit”, ka thënë ai, transmeton albinfo.ch.

E shefi i Grupit parlamentar LAA-në, Avdullah Hoti ka thënë se deklarimi i Kadri Veselit duhet parë si dorëzim i tij para vullnetit të deputetëve për t’u zgjedhur në krye të këtij institucioni.

Ndërsa deputeti i Nismës, Milaim Zeka ka kërkuar që të kalohet gjuha e fushatës dhe të gjendjet një zgjidhje.

Pas konsultimeve, kryesuesi i Kuvendit ka marrë vendim që ti ftoi  shefat e grupeve parlamnetar të të gjitha partive për tu marrë vesh për seancën e ardhshme.