Serbia duhet ta ndërrojë politikën për t’ u anëtarësuar në BE

Kreu i Aleancës së Hungarezëve të Vojvodinës, Istvan Pastor, ka theksuar se politika “Edhe Kosovën, edhe BE-në”, i takon të kaluarës dhe nuk shkon në drejtimin e duhur.

Sipas tij, politika të cilën e udhëheq presidenti Boris Tadiq dhe Qeveria e Serbisë nënkupton zgjedhjen e Kosovës para BE-së, raporton gazeta Blic.

Ai ka theksuar se presidenti dhe Qeveria serbe po tentojnë që t’i kthejnë gjërat si më parë, mirëpo, sipas tij, ajo gjendje ka përfunduar para dhjetë vjetësh.

Sipas tij, për të fituar statusin e kandidatit për anëtarësim në Bashkimin Evropian, Serbia duhet ta ndërrojë politikën ndaj Kosovës.

Për ndryshe, në mars, sipas tij, nuk do të ketë fjalë të mira për procesin e anëtarësimit të Serbisë në BE.