Ndërpriten linjat hekurudhore Prishtinë – Pejë dhe Prishtinë – Hani i Elezit 

E vetmja linjë hekurudhore që do të mbahet në operim, në transportin e udhëtarëve, mbetet ajo Prishtinë – Shkup – Prishtinë

Linjat hekurudhore në Kosovë janë pjesa e infrastrukturës më e pa zhvilluar që prej pas luftës. Deri tash institucionet e Kosovës nuk janë marrë fare me këtë sektor. Madje një kohë drejtuesit e Infakosit janë përballur edhe me fenomenin e vjedhjes së shinave të trenit të cilat në atë kohë shiteshin për hekur.

Pas shumë vështirësive Infrakos arriti ti fuste në funksionon disa nga linjat: atë për Shkup, për Han të Elezit dhe për Pejë. Kjo e fundit në masë të madhe është shfrytëzuar nga studentët pejanë që udhëtojnë për në Prishtinë. Por që nga sot Infrakos njofton se do të ndërpritet qarkullimi i të gjithë trenave në linjën e Pejës dhe atë të Hanit të Elezit, transmeton albinfo.ch.

E vetmja linjë hekurudhore që do të mbahet në operim, në transportin e udhëtarëve, mbetet ajo Prishtinë – Shkup – Prishtinë. “Ndërprerja e këtyre linjave, po bëhet për shkak të mungesës së mjeteve financiare, të cilat është dashur të sigurohen nga Qeveria e Kosovës”, kanë thënë përfaqësuesit e hekurudhave të Kosovës.