Presheva tubon studjues nga të gjitha trojet shqiptare

Shoqata për Trashëgimi dhe Krijimtari Kulturore e Luginës së Preshevës organizon Tribunën Shkencore me temë : “Dasma Shqiptare në Preshevë e rrethinë, dikur dhe sot”.

Në tribunë do të shqyrtohen dhe trajtohen aspekte të dasmës shqiptare në rajonin e Shkupit, Kumanovës, Gjilanit, Vitisë, Bujanocit, Medvegjës, Preshevës dhe gjetiu.

Tezat e temës që do të trajtohen në këtë tribunë janë: Dasma shqiptare sipas ndarjes rajonale Shkup, Kumanovë, Gjilan, Viti, Bujanoc, Medvegjë, Preshevë dhe më gjërë; Histori e dasmës shqiptare; Lirika dhe epika e dasmës shqiptare; Muzika, Kënga dhe Vallja në dasmën shqiptare, dikur dhe sot; Organizimi i Festivalit Folklorik i Dasmës Shqiptare në Preshevë dhe rrethinë; Gjurmimi, evidentimi dhe regjistrimi i dasmës shqiptare në Preshevë dhe rrethinë; Dasma shqiptare në mes të tradicionales dhe modernes; Vallet dhe këngët e burrave, të grave dhe të përziera në dasmën shqiptare, raporton INA.

Tribuna Shkencore do të organizohet dy ditë, më 24 dhe 25 dhjetor të vitit 2011.

Për këtë tribunë shkencore, janë paraqitur me kumtesat e veta shumë studjues dhe lëvrues të kësaj fushe të etnokulturës shqiptare nga të gjitha trojet e banuara me shqiptar.