Ministrja Mimoza Kusari-Lila po ngutet me reciprocitetin me Shqipërinë

Zyrtarë të institucioneve të Shqipërisë thonë se pala kosovare po e fsheh të vërtetën, duke fajësuar vetëm doganat e Shqipërisë që po aplikojnë masa të tilla.

Madje po del se Kusari Lila, më kot po u bie në qafë institucioneve të Shqipërisë për aplikimin e çmimeve referente për mallrat kosovare.

Ambasadori i Shqipërisë në Kosovë, Islam Lauka, ka thënë për Express se gjatë këtij viti Doganat e Kosovës në disa raste kanë aplikuar taksa për mallrat e Shqipërisë dhe për këtë është e njoftuar ministrja Kusari-Lila, por nuk janë bërë publike.

Sipas tij, marrëveshja e qershorit në të cilën thirret ministrja, mes dy vendeve për heqjen e këtyre masave asnjëherë nuk ka ekzistuar me shkrim, por ka qenë vetëm një vullnet politik për heqjen e tyre.

“Nuk ka qenë marrëveshje. Ajo ka qenë një shprehje e vullnetit nga ana e kryeministrit në një takim që ka qenë. Kam përshtypjen, vetë Kusari. Por, mesa duket pavarësisht vullnetit të dy vendeve fqinje dhe vëllazërore, që marrëdhëniet i kemi pa diskutim shumë të mira, ka nevojë që kjo marrëveshje të fiksohet me shkrim”, ka theksuar Lauka.