Doganës i duhen mbi 109 milionë euro

Më shumë se 109 milionë euro duhet të grumbullojnë deri në fund të këtij viti Doganat e Kosovës, për ta arritur cakun e planifikuar nga Ministria e Financave.

Deri në javën e 47-të të këtij viti, përkatësisht javën e parafundit të nëntorit 2011, Doganat kanë grumbulluar 721.8 milionë euro dhe për 5 javët e ardhshme, përkatësisht deri më 31 dhjetor 2011, Doganat duhet t’i grumbullojnë 830.5 milionë euro, apo edhe 109 milionë euro, ashtu siç është obliguar nga Ministria e Financave.

Për dallim nga periudha e njëjtë e vitit të kaluar, këtë vit, Doganat kanë grumbulluar 107 milionë euro më shumë, mirëpo deri në fund të këtij viti, për çdo javë i duhet t’i grumbullojnë mesatarisht rreth 20 milionë euro, që rrallëherë i ka ndodhur sivjet të grumbullojë aq mjete, shkruan Zëri.

Nga ana tjetër, në bazë të raportit statistikor të muajit shtator të këtij viti të Bankës Qendrore të Kosovës, të hyrat e mbledhura në kufij vazhdojnë të dominojnë strukturën e të hyrave buxhetore, të cilat deri në shtator 2011, përbëjnë 63.3 për qind të gjithsej të të hyrave.

Sipas këtij raporti, të hyrat e mbledhura në kufi j shënuan rritje vjetore prej 16 për qind, rritje kjo që deri në një masë i atribuohet rritjes së importeve gjatë kësaj periudhe (13.4 për qind). Në kuadër të tatimeve të mbledhura në kufij, Tatimi mbi Vlerën e Shtuar (TVSH) përbën kategorinë më të madhe, me pjesëmarrje prej 50.2 për qind në gjithsej të hyrat e mbledhura në kufi.

Vlera e të hyrave nga TVSH në kufi deri në shtator 2011, arriti në 296.4 milionë euro, që paraqet një rritje vjetore prej 13 për qind. Ndërsa, të hyrat nga akciza në kufi (përfshirë akcizën në duhan) u rritën për 22.8 për qind, duke arritur vlerën prej 207.6 milionë euro në shtator 2011.