Kosova mori pjesë në konferencën e OECD-së

OECD është forum përmes të cilit qeveritë e 34 vendeve punojnë dhe këmbejnë përvojat për tejkalimin e problemeve ekonomike

Në takimin e Organizatës për Bashkëpunim dhe Zhvillim Ekonomik (OECD), me temën “Ndërtimi i Vizionit 2020 për Evropën Juglindore”, që po mbahet në kuadër të aktiviteteve të javës së CEFTA-s në Paris, zv.kryeministrja dhe ministrja e Tregtisë dhe Industrisë, Mimoza Kusari – Lila, foli për rëndësinë e ngritjes së potencialit njerëzor në zhvillimin ekonomik të vendit.

“Ne jemi duke punuar në një strategji për Investimet e Huaja Direkte që do të identifikojë sektorët atraktiv për fuqinë punëtore të re dhe me arsim superior. Ne po ashtu jemi duke punuar në identifikimin e faktorëve që do të promovojnë investimet në sektorët inovativë. Besojmë se jo vetëm që do të rrisim produktivitetin përmes inovacioneve, por edhe do të promovojmë një kulturë moderne të ndërmarrësisë”, ka theksuar ministrja Kusari-Lila, shkruan Zëri.

Në të njëjtën ndërtesë, në kuadër të javës së CEFTA-s, Oda Ekonomike e Kosovës udhëhoqi takimin rajonal të odave ekonomike të vendeve anëtare të CEFTA-s. Kryetari i OEK, Safet Gërxhaliu, shprehu nevojën për të forcuar komunikimin mes OECD dhe Kosovës në mënyrë që të krijohet një model bashkëpunimi për promovim vlerash të përbashkëta.

“Ne besojmë se kemi nevojë të rrisim komunikimin në mes nesh, duke krijuar një model bashkëpunimi që na mundëson t’i bashkojmë njerëzit dhe t’i promovojmë vlerat tona të përbashkëta duke eliminuar barrierat politike”, tha kryetari OEK, Gërxhaliu.

OECD është forum përmes të cilit qeveritë e 34 vendeve anëtare punojnë dhe ndajnë në mes veti përvojat për tejkalimin e problemeve ekonomike.

Java e CEFTA-s, e cila filloi më 22 nëntor, shënon fundin e kryesimit të Kosovës. Vitin e ardhshëm marrëveshja e tregtisë së lirë (CEFTA) do të kryesohet nga Shqipëria.