Porosia e ambasadorëve: Mos i votoni të korruptuarit

Mesazhi i ambasadorit amerikan, Greg Delawie ishte që të mos votohen të korruptuarit, apo ata që janë të akuzuar

Kohë më parë është lansuar iniciativa “#AsUnë” nga koalicioni i organizatave për vëzhgimin e zgjedhjeve “Demokracia ne Veprim”, që votuesit të mos votojnë të korruptuarit, raporton albinfo.ch.

Kjo iniciativë çdo ditë e më shumë po merr përkrahje. I fundit ishte ambasadori i SHBA-së në Kosovë, Greg Delawie.

Mesazhi i ambasadorit amerikan ishte që të mos votohen të korruptuarit, apo ata që janë të akuzuar.

Ditë më parë edhe ambasadorja e Mbretërisë së Holandës, Gerrie Willems ka mbështetur iniciativën e Shoqërisë Civile në Kosovë “#AsUnë” nuk do të votoja kandidatët e korruptuar.

Edhe ambasadori i Britanisë së Madhe në Kosovë, Ruairi O’Connell, i është bashkuar kësaj fushate. “Si votoj unë në Britani? Para zgjedhjeve unë mendoj: Filozofia e cilës parti përshtatet me filozofinë time? A i besoj unë premtimeve të tyre apo mendoj që ato janë qesharake? Kur ishin në pozitë, a bënë atë që premtuan që do të bënin? A mendoj që janë të gatshëm të kryejnë punën që kërkohet nga ta? Por më e rëndësishmja, unë kurrë nuk do të votoja për një parti e cila ka përkrahur kriminelët ose ka përfshirë kriminelët në listat e tyre”, ka thënë ai.