Zvicra mbështet barazinë gjinore në Kosovë

LOGOS-i për komunat partnere të Kosovës Jug -Lindore ka ndarë 63 mijë euro, ku secila komunë ka përfituar nga një grand prej 7 mijë euro

Projekti Zvicër – Kosovë, për qeverisje lokale dhe decentralizim, LOGOS, që implemntohet nga Fondacioni　 “Helvetas –Intercooperation” dhe financohet nga Qeveria e Zvicrës,　 të mërkurën në Gjilan, ka nënshkruar marrëveshjen e financimit të nëntë projekteve për barazi gjinore si dhe ka prezantuar nëntë projekte për mbështetje të Zyrave të Informimit Publik, për nëntë komuna të Kosovës Jug–Lindore,　Kamenicë, Novobërdë, Ranillug, Partesh, Kllokot, Viti, Kaçanik, Hani i Elezit dhe Shterpce.

Në kuadër të marrëveshjeve të financimit për projektet e barazisë gjinore, projekti LOGOS, për komunat partnere të Kosovës Jug -Lindore ka ndarë 63 mijë euro, ku secila komunë ka përfituar nga një grand prej 7 mijë euro, njofton portali 2lonline.

Kurse, për projektet në mbështetje të zyrave të informimit publik, janë ndarë 18 mijë euro, ku secila komunë ka përfituar nga një grand prej 2 mijë euro. Projektet që kanë të bëjnë me barazinë gjinore do të implementohen nga zyrat komunale të barazisë gjinore si dhe OJQ-të lokale, kurse projektet për mbështetje të zyrave të informimit publik do të implemntohen nga vetë zyrat komunale për informim dhe marrëdhënie me publikun.

Koordinatori i projektit LOGOS, Norbert Piljs, ka thënë se, qeveria zvicerane është e interesuar që fondet e saja ti shpenzoi për zhvillimin e demokracisë lokale dhe në këtë drejtim projekti LOGOS, mbështet projektet që kanë të bëjnë me avancimin e punës së zyrave për informim publik dhe zyrat për barazi gjinore.

Merita Barileve, zyrtare për projekte në projektin LOGOS ka thënë se Projekti LOGOS, një vëmendje të veçantë i ka kushtuar edhe barazisë gjinore dhe për këtë qëllim janë ndarë 63 mijë euro　 ku secila komunë ka përfituar nga një projekt në vlerë prej 7 mijë euro.

Ibadete Hyseni, zyrtare për barazi gjinore në Viti, ka thënë se përmes fondit nga projekti LOGOS, zyra për barazi gjinore në Viti　 do të implementoi projektin që ka të bëjë me promovimin e ligjit për barazi gjinore dhe inicimin e　 procesit të implementimit të perspektivës gjinore përmes politikave buxhetore të komunës. 　

Kurse Bashkim Sopa, zyrtar për informim publik i komunës së Hanit të Elezit, ka thënë se përmes mbështetjes që i ka dhënë projekti LOGOS, zyrave për informim publik po fuqizohet　 puna e tyre.