Kosova de facto në NATO, thotë Berisha

"Me bashkëpunimin që ka me KFOR, Kosova është një vend me garanci, stabilitet dhe paqe në rajon", ka thënë Berisha.

Kryeministri Berisha ka deklaruar se Kosova, në disa prej aspekteve të bashkëpunimit, është de fakto anëtare e NATO-s.

Duke folur në takimin e “Kartës së Adriatikut”, kreu i qeverisë shqiptare ka theksuar se mbështetja e NATO-s ka qenë mjaft e rëndësishme për Kosovën.

“Në disa aspekte Kosova është de fakto anëtare e NATO-s, por jo de jure. Me bashkëpunimin që ka me KFOR, Kosova është një vend me garanci, stabilitet dhe paqe në rajon”, ka thënë Berisha.

Sipas tij, pas kapërcimit të problemit në Veriun e Kosovës, Serbia do të marrë rolin që i takon.

Kryeministri Berisha gjithashtu ka thënë se qëndrimi i qeverisë shqiptare për të ardhmen e Aleancës dhe hyrjen e vendeve të reja është i qartë.

“Shqipëria është e hapur për bashkëpunimin e ngushtë me vendete tjera dhe do të mbështes aspiratën e vendeve të tjera”, ka thënë Berisha.

Sipas tij, gjithashtu nisma e ndërmarrë vite më parë mes vendeve të rajonit ka rezultuar e suksesshme dhe se tashmë rajoni është më i sigurt dhe më i qartë në objektivat e tij.