Thaçi rithekson vijat e kuqe të Kosovës

Kryeministri Hashim Thaçi së bashku me zëvendëskryeministret Edita Tahiri, Mimoza Kusari dhe ministren Vlora Çitaku, e kanë pritur në një takim ndërmjetësin e BE-së lidhur me dialogun teknik, Robert Cooper.

Kryeministri Thaçi ka theksuar se Kosova e ka platformën e qartë me vijat e kuqe të cilat janë pavarësia, integriteti territorial dhe rregullimi i brendshëm i Kosovës.

Pas takimit nuk ka pasur prononcime, por nëpërmjet një komunikate për media të lëshuar nga Zyra për Informim e Qeverisë thuhet se kryeministri Thaçi e ka falënderuar Cooperin për punën e tij si lehtësues i dialogut.

Ai ka përsërit qëndrimin parimor të Qeverisë së Kosovës se dialogu është vlerë evropiane dhe Kosova është e gatshme të dialogojë me të gjithë fqinjët lidhur me zgjidhjen e problemeve praktike ndërshtetërore, në këtë kuadër edhe me fqinjin verior Serbinë, thuhet në komunikatë.

Kryeministri Thaçi, ka ripërsëritur se Kosova ka treguar përgjegjshmëri të lartë në procesin e dialogut, të cilin vlerësim e ndajnë edhe Brukseli dhe Uashingtoni.

Thaçi ka theksuar se Kosova e ka platformën e qartë me vijat e kuqe të cilat janë pavarësia, integriteti territorial dhe rregullimi i brendshëm i Kosovës.

“Republika e Kosovës ka agjendë euroatlantike dhe po punon pandërprerë që rruga e integrimit në NATO dhe në Bashkim Evropian të jetë sa më e shkurtër dhe që qytetarët e Kosovës t’i ndiejnë praktikisht të mirat që sjell procesi i integrimit dhe i reformave. Në këtë kuadër, edhe dialogu për çështje teknike me Serbinë është rrugë përmes së cilës të dy shtetet do të mund të zgjidhin çështjet e bashkëpunimit ndërfqinjësor dhe të interesit të ndërsjellë të qytetarëve të të dyjave vendeve”, citohet të ketë thënë Thaçi.

Kryeministri Hashim Thaçi ka vlerësuar se Republika e Kosovës tanimë është e gatshme për të thelluar marrëdhëniet formale me Bashkimin Evropian, duke i plotësuar të gjitha standardet dhe kriteret e domosdoshme të integrimit dhe anëtarësimit.